Vəndam kəndində taksi aşıb: XƏSARƏT ALAN VAR

Qəbələ rayonunda yol-nəqliyyat hadisəsi baş verib.

Oxu.Az xəbər verir ki, bununla bağlı videogörüntü sosial şəbəkədə paylaşılıb.

Belə ki, Vəndam kəndi ərazisində BYD markalı "Bolt" taksi xidmətinə məxsus avtomobilin yol kənarındakı çökəyə aşması nəticəsində bir nəfərin yüngül xəsarət aldığı bildirilir.

Hadisə ilə bağlı Oxu.Az-ın sorğusuna cavab olaraq Baş Dövlət Yol Polisi İdarəsinin (BDYPİ) rəsmisi, polis polkovnik-leytenantı Mübariz Ağayev bildirilib ki, hadisə bu gün saat 14 radələrində Qaraməryəm-İsmayıllı-Şəki avtomobil yolunun 54-cü kilometrliyində qeydə alınıb.

"Qəbələ rayonunun Vəndam qəsəbəsi ərazisində Ceyhun Məmmədovun idarə etdiyi BYD markalı, 77-UH-945 dövlət qeydiyyat nişanlı avtomobil yoldan çıxaraq aşıb. Avtomobildə olan üç sərnişindən biri xəsarət alıb. Hadisə yerinə polis əməkdaşları cəlb olunublar, faktla bağlı araşdırma aparılır", - deyə məlumatda qeyd olunur.

Əzizə İsmayılova