Xətai rayonunda binanın zirzəmisi kanalizasiya sularına "qərq olub" - ŞİKAYƏT

Xətai rayonu, Telnov küçəsindəki 18 nömrəli binanın sakinləri zirzəmiyə kanalizasiya sularının axmasından şikayətçidirlər.

Oxu.Az-a şikayət ünvanlayan sakin bildirib ki, Telnov, 18, 8-ci blokun zirzəmisinə tez-tez kanalizasiya suları yığılır.

"Dəfələrlə yazırıq, gəlib suyu çəkirlər, yenə yığılır. Problemi kökündən həll edən yoxdur. Nəmişliyin içindəyik. Ağcaqanad əlindən qapını da açıq qoymaq olmur", - deyə sakin bildirib.

İri Şəhərlərin Birləşmiş Su Təchizatı Xidmətindən Oxu.Az-ın sorğusuna cavab olaraq bildirilib ki, sözügedən ünvanda yığılan qrunt sularıdır.

"Məsələ ilə bağlı müvafiq sukanal idarəsinə müraciət daxil olduğu təqdirdə qəza briqadası əraziyə cəlb edilir, əhaliyə köməklik göstərilir. Hazırda qəza briqadası vəziyyətlə bağlı məlumatlandırılıb və müvafiq tədbirlər həyata keçiriləcək", - deyə açıqlamada bildirilib.

Əzizə İsmayılova