Yeni xəstəlik mənbəyi: elektron siqaret aludəçiləri artır, rəqəmlər isə açıqlanmır

Son vaxtlar gənclər elektron siqaret çəkməyə üstünlük verirlər. Bununla da siqareti tərgidəcəklərini düşünürlər, amma elektron siqaretin səhhətlərinə ziyan olduğunu bilmirlər.

Artıq bir çox ölkələrdə elektron siqaretlərin fəsadları qeydə alınıb. Belə ki, ABŞ-da 200-ə yaxın insan elektron siqaret çəkməsi nəticəsində xəstələnib. Aparılan araşdırmalara görə, iyulun 28-dən etibarən ölkədə qeydə alınan 193 ağciyər və tənəffüs xəstəlikləri elektron siqaretdən istifadəyə görə baş verib.

Səhiyyə Nazirliyinin İctimai Səhiyyə İslahatlar Mərkəzinin İctimai Sağlamlıq şöbəsinin müdiri Tofiq Musayev mövzu ilə bağlı Oxu.Az-a açıqlamasında elektron siqaretin adi siqaretdən daha təhlükəli olduğunu və ona müraciət edənlərin sayının getdikcə artdığını bildirib:

"Araşdırmalar elektron siqaret çəkənlərin sayının artdığını göstərir. Amma hələ dəqiq rəqəmlər göstərilmir. Hətta bir necə il öncə Ümumdünya Səhiyyə Təşkilatı öz narahatlığını bildirərək, elektron siqaretlərdən istifadə edənlərin sayının getdikcə artdığını, bu siqaretlərin təbliğ edildiyini bəyan etmişdi".

T.Musayev deyib ki, hazırda bir çoxları tütündən xilas olmaq üçün təhlükəsiz olduğunu zənn edərək, elektron siqaret çəkirlər, amma bunun daha ziyanlı olduğunu bilmirlər:

"Ümumiyyətlə, elektron siqaretdən sonra asanlıqla adi siqaretə keçmək mümkündür. Elektron siqaretin təhlükəli olub-olmaması ilə bağlı aparılan araşdırmalar zamanı məlum olub ki, onun tərkibində qızdırılanda buxar yaradan maddələr əmələ gəlir. Onların hər biri təhlükə mənbəyidir, müxtəlif onkoloji və böyrək xəstəliklərinə səbəb olur".

Şöbə müdiri növbəti illərdə də elektron siqaret çəkənlərin sayında artım ola biləcəyini istisna etməyib:

"Bu sahədə tədqiqatlar hələ davam edir. Hazırda Azərbaycan da daxil olmaqla, dünya səviyyəsində bu məsələ ilə əlaqədar yeni tədbirlər görülməyə başlanılır”.

Sevinc Yasinqızı