"Nəzrin "Mərcan" klinikasında burnundan əməliyyat olunandan sonra komaya düşüb".
Bunu Oxu.Az-a açıqlamasında Nəzrin Mansurovanın əmisi oğlu Mütəllim Abışov deyib.
O bildirib ki, əmisi qızı yanvarın 3-də əməliyyata girib:
"Yanvarın 4-ü, gecə saatlarında onun halı pisləşdi. Yanvarın 5-i qızdırması yüksəldi, mədə bulanması və qusma oldu. Təcili tibbi yardım çağırdıq. Vəziyyəti pis olduğu üçün yolda koma vəziyyətinə düşdü, "Liv Bona Dea Hospital"a yerləşdirildi. Hazırda da koma vəziyyətindədir".
"Liv Bona Dea Hospital"ın Reanimasiya və intensiv terapiya şöbəsinin müdiri Təranə Göyüşova Oxu.Az-a açıqlamasında bildirib ki, hazırda Nəzrin Mansurova süni tənəffüs aparatına qoşulub:
"Xəstə Nəzrin Mansurova yanvarın 5-də "Liv Bona Dea Hospital"ın Reanimasiya şöbəsinə kritik ağır vəziyyətdə daxil olub. Hazırda vəziyyəti ağır olaraq qalmaqdadır. O, süni tənəffüs aparatına qoşulub. İntensiv müalicə və müşahidə davam etdirilir".
Maraqlıdır, bəs görəsən, rinoplastika əməliyyatı etdirən pasiyent koma vəziyyətinə düşə bilərmi?
Tibb məsələləri üzrə ekspert Adil Qeybulla suallarımıza cavab olaraq bunun mümkün ola biləcəyini söyləyib:
"İlk olaraq xəstənin koma vəziyyətinə düşmə səbəbi araşdırılmalıdır. Koma vəziyyəti əməliyyat zamanı qapalı kəllə-beyin travmasından, narkozdan və ya infeksiya keçməsi səbəbindən yarana bilər. İlkin məlumat kimi rentgendə əgər alın sümüyünün çatı göstərilirsə, buna səbəb qapalı kəllə-beyin travması olub. Beyindaxili qanaxma yoxdursa, digər proseslər olmayıbsa, xəstə müalicə almalıdır.
Həmçinin, burada həkimin məsuliyyəti də araşdırılmalıdır. Bəzən olur ki, kəllə sümüyünün özündə də müəyyən problemlər, ağlagəlməyən səbəblər ola bilər. Bu baxımdan, bu vəziyyətin estetik əməliyyat zamanı baş verən texniki səhvə bağlılığı və ya xəstənin orqanizmində olan fərdi xüsusiyyətə bağlılığı araşdırılmalıdır. Burada əsas məsələ həkim məsuliyyətinin təyin edilməsidir. Ona görə də ekspertlər təyin edilməli, bu işlə məşğul olmalı, məsələni araşdırmalıdırlar".
Xatırladaq ki, burun əməliyyatı etdirən 30 yaşlı Nəzrin Mansurovanın komaya düşməsi barədə Səhiyyə Nazirliyi Analitik Ekspertiza Mərkəzində (AEM) yoxlama başlanılıb.
Aygün Mirakif
