Xırdalan-Masazır-Novxanı avtomobil yolunun Zəngilan rayonundan olan keçmiş məcburi köçkünlərin məskunlaşdığı şəhərciyə gedən hissəsində yaranmış problemin aradan qaldırılması istiqamətində işlərə başlanılıb.
Abşeron Regional Su Meliorasiya Sistemlərinin İstismarı İdarəsindən Oxu.Az-a verilən məlumata görə, qəza baş verəndən sonra idarənin əməkdaşları əraziyə cəlb ediliblər. Tullantı sularının kollektordan maneəsiz ötürülməsini təmin etmək məqsədilə nasos stansiyasında əlavə aqreqatlar quraşdırılıb.
Hazırda ərazidə təhlükəsizlik tədbirləri görülüb. Xüsusi texnikalar vasitəsilə kollektorun qəzalı hissəsinin dəyişdirilməsi üçün qazıntı işlərinə başlanılıb. İdarədən bildirilib ki, qəzanın nəticələrinin tam aradan qaldırılması üçün işlər sürətlə davam etdirilir.
Xırdalan-Masazır-Novxanı avtomobil yolunun Zəngilan rayonundan olan keçmiş məcburi köçkünlərin məskunlaşdığı şəhərciyə gedən hissəsində çökmə hadisəsi qeydə alınıb. Dərhal əraziyə agentliyin əməkdaşları cəlb olunub, əlavə təhlükəsizlik tədbirləri görülüb və hərəkətin təhlükəsiz təşkili təmin edilib.
Bu məlumat Oxu.Az-ın sorğusuna cavab olaraq Azərbaycan Avtomobil Yolları Dövlət Agentliyindən (AAYDA) verilib.
"Aparılmış ilkin araşdırmalara əsasən, çökməyə səbəb kanalizasiya kollektorunda baş vermiş qəza nəticəsində suyun yol yatağını yuması olub. Baş vermiş hadisə ilə bağlı operativ tədbirlərin görülməsi və problemin aradan qaldırılması məqsədilə aidiyyəti quruma dərhal məlumat verilib.
Hazırda ərazidə vəziyyətin tam stabilləşdirilməsi və qəzanın aradan qaldırılması üçün aidiyyəti qurum tərəfindən müvafiq addımlar atılır", - deyə məlumatda vurğulanır.
Abşeron rayonu, Masazır kəndi ərazisində yerləşən "Zəngilan şəhərciyi"ndə yeni inşa olunan yol qısa müddət sonra çöküb.
Oxu.Az xəbər verir ki, sözügedən ərazidə çəkilən yolun bəzi hissələrində ciddi çökmə və deformasiya müşahidə olunub.
Yol örtüyündə yaranan bu problemlər həm nəqliyyat vasitələrinin hərəkətini çətinləşdirib, həm də sürücülər üçün təhlükə yaradıb.
Sakinlərin sözlərinə görə, yolun bu vəziyyətə düşməsi tikinti zamanı keyfiyyət standartlarına tam riayət olunmaması ehtimalını gündəmə gətirir.
Məsələ ilə bağlı aidiyyəti qurumlara informasiya sorğusu verilib.
