ABŞ-də FTB-nin sabiq direktorunun Donald Trampa sui-qəsd çağırışı araşdırılır

ABŞ hökuməti Federal Təhqiqatlar Bürosunun (FTB) sabiq direktoru (2013-2017-ci illərdə) Ceyms Komi tərəfindən dövlət başçısı Donald Trampa qarşı ehtimal edilən sui-qəsd çağırışını araşdırır.

Oxu.Az xəbər verir ki, bu barədə ABŞ-nin Məxfi Xidmətinin rəsmi nümayəndəsi Entoni Qulyelmi "X" hesabında yazıb.

"Biz mühafizə etdiyimiz şəxslər üçün potensial təhlükə sayıla biləcək hər şeyi hərtərəfli araşdırırıq. Biz FTB-nin sabiq direktoru Kominin sosial şəbəkədəki paylaşımından xəbərdarıq və bu cür bəyanatları çox ciddi qəbul edirik", - deyə E.Qulyelmi yazıb.

Öz növbəsində, ABŞ daxili təhlükəsizlik naziri Kristi Noem də Ceyms Kominin D.Trampın öldürülməsinə çağırış etdiyini qeyd edərək, hüquq mühafizə orqanlarının bu təhlükəni araşdıracaqlarını və buna uyğun cavab verəcəklərini bildirib.