ABŞ-nin Vaşinqton ştatının Takoma şəhərində polis sahildə tərk edilmiş gəmidə 30-dan çox pişik aşkar edib və onları xilas edərək yerli sığınacağa yerləşdirib.
Oxu.Az xəbər verir ki, bu barədə yerli "News Tribune" qəzeti şəhər polis idarəsinin ictimaiyyətlə əlaqələr üzrə nümayəndəsi Con Korreaya istinadən məlumat yayıb.
Onun sözlərinə görə, hüquq-mühafizə orqanlarının əməkdaşlarının qarşılaşdığı mənzərə daha çox Yaponiyanın "Ghibli" studiyasının cizgi filmini xatırladıb. Pişiklər sanki gəminin əsl sahibləri imiş.
Axtarış üçün icazə aldıqdan sonra polislər gəmiyə qalxaraq heyvanları oradan çıxarıb və yerli sığınacağa aparıblar.
Məlumata görə, gəmidə həm yetkin pişiklər, həm də balalar olub. Onların bir çoxu qorxmuş və zəif vəziyyətdə olublar.
Gəminin sahibinin kimliyi müəyyən edilsə də, onunla əlaqə saxlamaq mümkün olmayıb. Korreanın sözlərinə görə, hələlik heç kim saxlanılmayıb və araşdırma davam edir. Tərk edilmiş gəmi isə lövbərə alınıb.
