Oktyabrın 18-də ABŞ-də Kemp-Pendlton hərbi bazasında Dəniz Piyada Korpusunun 250 illik yubileyi münasibətilə keçirilən nümayiş atışı zamanı atılan 155 millimetrlik mərmi, ABŞ vitse-prezidenti Ceyms Devid Vensi müşayiət edən patrul maşınlarının keçdiyi yolun üzərində vaxtından əvvəl partlayıb.
Oxu.Az xəbər verir ki, bu barədə "The New York Times" (NYT) yol patrul xidmətinin hesabatına istinadən məlumat verib.
Qeyd olunub ki, partlayış Los-Ancelesi San-Dieqo ilə birləşdirən yolun üzərində baş verib. Mərminin qəlpələri vitse-prezidentin mühafizəsinə aid olan motosikleti və yol patrul xidmətinin avtomobilini zədələyib. Məlumata görə, istifadə olunan mərmilər döyüş sursatı olub.
Bildirilib ki, artilleriya atəşi yerli vaxtla saat 13:46-da Uayt çimərliyindən, yol patrul xidmətinin əməkdaşlarının Vensi tədbirə müşayiət etdikdən sonra parklandıqları yoldan bir kilometrdən bir qədər artıq məsafədən açılıb.
Hərbiçilər təxminən 60 ədəd 155 millimetrlik mərmi ilə atəş açıblar. Bir mərmi vaxtından əvvəl partladıqdan sonra atışlar dayandırılıb. Patrul xidmətinin əməkdaşları şoseni qəlpələrin mövcudluğuna dair yoxlayıblar, lakin heç bir qəlpə aşkar etməyiblər. Bundan sonra yol nəqliyyatın hərəkəti üçün açılıb.
Hadisə nəticəsində mühafizəçilərdən heç kim xəsarət almayıb. Qəlpələr, həmçinin magistrala çıxan yolda parklanmış avtomobillərə də dəyib.
