Böyük Britaniyanın paytaxtı London smartfon oğurluğu epidemiyası ilə qarşılaşıb.
Oxu.Az-ın xəbərinə görə, bu barədə "The New York Times" nəşri məlumat verib.
Məlumata görə, bu şəhərdə 2023-cü ildəki 64 min göstəricisi ilə müqayisədə 2024-cü ildə rekord sayda - 80 min telefon oğurlanıb və bu da polisi cinayətkar şəbəkələrə qarşı genişmiqyaslı əməliyyata başlatmağa vadar edib.
Nəşrin qeyd etdiyinə görə, elektrikli velosiped sürən oğrular piyadaların telefonlarını dartıb götürüb, daha sonra bu telefonlar mağazalar şəbəkəsi vasitəsilə başqa ölkələrə göndərilir. Son reydlər zamanı polis təxminən 2 000 oğurlanmış telefon və 200 000 funt sterlinq (267 000 dollar) nağd pul ələ keçirib. İzləmə siqnallarını bloklamaq üçün alüminium folqadan istifadə edən mümkün qrup rəhbərləri saxlanılıb.
Ekspertlər cinayətin artmasının səbəbini 2010-cu ildə Britaniyanın hüquq-mühafizə orqanlarına ayrılan maliyyənin azaldılması və sürətli hərəkət üçün ideal vasitəyə çevrilmiş elektrik velosipedlərinin çoxalması ilə əlaqələndirirlər. London Universitetinin kriminologiya professoru Emmelin Teylorun qeyd etdiyi kimi, xırda cinayətkarlar əməllərinə görə demək olar ki, cəza almırlar.
London polisi etiraf edir ki, oğurluqların yalnız kiçik bir faizi məsuliyyətə cəlb olunma ilə nəticələnir: il ərzində qeydə alınan 106 000 oğurluq hadisəsində yalnız 495 şəxsə ittiham irəli sürülüb.
