Dəməşq Məhkəməsi Suriyanın keçmiş prezidenti Bəşər Əsədin yaxın qohumu Vasim Əsədi ölüm cəzasına məhkum edib.
Oxu.Az-ın xəbərinə görə, bu barədə "Syrian Arab News Agency" (SANA) agentliyi məlumat verib.
Vasim Əsəd bir neçə nəfərin qəsdən öldürülməsində, eləcə də insanlığa qarşı cinayətlər və hərbi cinayətlər kimi təsnif edilən işgəncə ilə bağlı cinayətlərdə təqsirli bilinib.
Xatırladaq ki, avqustun 11-də Suriya məhkəməsi ölkənin keçmiş prezidenti Bəşər Əsədi qiyabi olaraq ölüm cəzasına məhkum edib. Keçmiş dövlət başçısı insanlığa qarşı cinayətlərdə təqsirli bilinib.
2024-cü il dekabrın 8-də ABŞ və Türkiyə tərəfindən dəstəklənən "Azad Suriya ordusu"nun komandanlığı Bəşər Əsədin hakimiyyətinə son qoyulduğunu elan edib. Daha sonra KİV Əsədin öz ailəsi ilə birlikdə Rusiyaya gəldiyini və orada onlara "humanitar xarakterli səbəblərdən" sığınacaq verildiyini bildirib. Rusiyaya qaçdıqdan sonra Əsəd ailəsi Moskvanın mərkəzindəki "Four Seasons" hotelində yaşayıb, daha sonra "Moskva Siti"dəki "Federasiya" qülləsində yerləşən ikimərtəbəli penthausa, oradan isə Rublyovkaya köçüb. Onları xüsusi xidmət əməkdaşları qoruyurlar.
