ABŞ Prezidenti Donald Tramp bildirib ki, doğum yerinə görə vətəndaşlıq hüququnun məhdudlaşdırılması məsələsinə Ali Məhkəmədə yenidən baxılmasına nail olacaq.
Oxu.Az xəbər verir ki, o bu barədə çərşənbə günü "Truth Social" platformasındakı hesabında paylaşım edib.
Dövlət başçısı Ali Məhkəmənin sözügedən hüququ məhdudlaşdıran sərəncamını Konstitusiyaya uyğun hesab etməyən qərarını növbəti dəfə qınayıb. Eyni zamanda, o, ABŞ-də dünyaya gələn uşağın ailə üzvlərinin ABŞ vətəndaşlığı almaq imkanı yaradan sistemi cinayət fırıldaqçılıq kimi qiymətləndirib.
"Bu işə Ali Məhkəmədə dərhal yenidən baxılmasını tələb edəcəyəm. Əgər mənasız qərar dəyişdirilməsə, bu səhv Amerikanın məhvinə gətirib çıxaracaq", - deyə Tramp bildirib.
Xatırladaq ki, Tramp doğuma görə ABŞ vətəndaşlığının əldə edilməsini məhdudlaşdıran sərəncamı 2025-ci il yanvarın 20-də, andiçmə mərasimindən sonra imzalamışdı. O, aidiyyəti dövlət orqanlarına valideynləri ölkədə qeyri-qanuni olan və ABŞ-də doğulan uşaqlara vətəndaşlıq verilməməsini tapşırmışdı. Bu qadağa həmçinin anası ölkəyə vizasız rejim, eləcə də təhsil, iş, turist vizası ilə müvəqqəti gəlmiş, atası isə Amerika vətəndaşı olmayan və ya daimi yaşamaq hüququna malik olmayan uşaqlara da şamil edilib.
