Polşa polisi Böyük Polşa voyevodalığının Oborniki şəhərində hökumət başçısı Donald Tuskun qətlinə səsləyən 46 yaşlı ölkə vətəndaşını həbs edib.
Oxu.Az xəbər verir ki, bu barədə Polşa hökumətinin mətbuat katibi Adam Şlapka məlumat yayıb.
"Dünən polis Oborniki şəhərində internet vasitəsilə Polşa hakimiyyəti nümayəndələrinin, o cümlədən Baş nazir və Seymin spikerinin öldürülməsinə açıq çağırışlar etməkdə şübhəli bilinən 46 yaşlı kişini saxlayıb", - deyə A.Şlapka "X" sosial şəbəkəsində yazıb.
Qeyd edək ki, bu, D.Tusk və Polşanın digər aparıcı siyasətçilərinə ünvanlanan hədələrlə bağlı son günlər ərzində həyata keçirilən ikinci belə həbsdir. Daha əvvəl, oktyabrın 11-də hökumət rəhbərinə və müdafiə naziri Vladislav Kosinyak-Kamışa təhdid mesajları göndərməkdə şübhəli bilinən 60 yaşlı kişi saxlanılmışdı.
