Dünyanın şəhərləri üzrə yenilənmiş təhlükəsizlik indeksi (Safety Index) açıqlanıb. Bu göstərici cinayətkarlıq səviyyəsi, terror təhlükəsi, korrupsiya və ümumi sosial sabitliyi əks etdirir.
Oxu.Az "Numbeo" agentliyinə istinadən xəbər verir ki, reytinqdə liderlik Birləşmiş Ərəb Əmirliklərinin (BƏƏ) şəhərlərinə məxsusdur.
Belə ki, siyahının ilk dörd pilləsini müvafiq olaraq Əcman (88.8 bal), Əbu-Dabi (88.6 bal), Ras əl-Xeymə (85.4 bal) və Şarca (84.7 bal) tutur. Beşinci yerdə 84.6 balla Qətərin paytaxtı Doha qərarlaşıb. Ondan bir qədər geridə isə BƏƏ-nin Dubay şəhəri (83.8 bal) yer alıb. Reytinqdə yüksək nəticə göstərən digər şəhərlər arasında Tayvanın Taybey şəhəri (83.4 bal), Omanın paytaxtı Maskat (81.4 bal) və Niderlandın Haaqa şəhəri (78.9 bal da) var.
Dünyanın ən təhlükəli hesab olunanan şəhərləri isə, əsasən, Cənubi Afrika Respublikasında yerləşir. Siyahının sonlarında Pretoriya (18.3 bal), Venesuelanın paytaxtı Karakas (18.5 bal), Papua-Yeni Qvineyanın Port-Morsbi (18.7 bal), CAR-ın Pitermaritsburq (18.7 bal) və Yohannesburq (19.2 bal) şəhərləri qərarlaşıb.
Ekspertlər qeyd edirlər ki, təhlükəsizlik indeksi ilə həyat keyfiyyəti, əhalinin gəlir səviyyəsi və hüquq-mühafizə orqanlarının effektivliyi arasında birbaşa əlaqə mövcuddur. Hətta eyni ölkə daxilində belə şəhərlər arasında ciddi fərqlər ola bilər. Ümumilikdə reytinq siyahısına 401 şəhər daxil edilib.
Qeyd edək ki, Azərbaycanın paytaxtı Bakı 69.9 balla dünya üzrə 78-ci yerdə qərarlaşıb. Bu göstərici Şotlandiyanın Edinburq (69.7 bal) və Niderlandın Amsterdam (70 bal) şəhərlərinin nəticələri ilə müqayisə edilə bilər.
