Filippinin Neqros adasındakı Kanlaon vulkanında püskürmə baş verib.
Oxu.Az-ın "Haber Global"a istinadən xəbərinə görə, bu barədə Filippin Vulkanologiya və Seysmologiya İnstitutundan (Phivolcs) məlumat verilib.
Məlumata görə, Kanlaon vulkanı yerli vaxtla saat 2:55-də aktivləşib. Püskürmə 5 dəqiqə davam edib və vulkandan təxminən 3 kilometr yüksəkliyə kül səpilib.
Həmçinin vulkanın cənub yamaclarında 2 kilometr məsafədə isti qaz və vulkanik maddələrdən ibarət axın müşahidə olunub.
Partlayışdan sonra bölgədə 3-cü səviyyəli xəbərdarlıq statusunun hələ də qüvvədə olduğu qeyd edilib.
Filippin Vulkanologiya və Seysmologiya İnstitutu vulkana yaxın yaşayış məntəqələrinin boşaldılmasının zəruriliyini bildirib, axın, qaya parçaları və kül yağışı kimi təhlükələrə qarşı diqqətli olmağa çağırıb.
Eyni zamanda, yerli KİV vulkan püskürməsi ilə bağlı bəzi istiqamətlərə təyyarə uçuşlarının təxirə salındığını yazıb. Ölkənin "AirAsia" şirkəti Manila, Bokolod, Sebu, Taqbilaran və İloylo istiqamətlərində uçan sərnişinlərə səfərlərində gecikmələr ola biləcəyini, bu istiqamətlərdə uçuşların mümkün kül buludunun örtülməsi ilə bağlı yaxından izlənildiyini bildiriblər.
