Fransa xarici işlər naziri Jan-Noel Barro Suriyanın yeni hakimiyyət nümayəndələrinin alman həmkarı Annalena Berbokla əl sıxmaqdan imtina etməsinə münasibət bildirərək, bunun onların ölkəyə birgə səfərinin məqsədi olmadığını bildirib.
Oxu.Az-ın verdiyi məlumata görə, bu barədə o, RTL-ə müsahibəsində bildirib.
Fransa XİN rəhbəri SƏR-in yeni hökumətinin fərqli davranmasını üstün tutduğunu qeyd edib.
"Suriya administrasiyasının rəhbəri Əhməd əş-Şaraanın alman həmkarımla əl sıxmasını istərdimmi? Cavab - bəli. Bu mənim səfərimin məqsədi idimi? Cavab - xeyr", - deyə Barro vurğulayıb.
Onun sözlərinə görə, Dəməşqdə o, ölkədə saxlanılan 10 minlərlə İŞİD terrorçularının aqibəti və Əsədin silah arsenalının yayılması riskləri kimi məsələlərə diqqət yetirib.
"Əgər mən Suriyaya getməsəm, fransızları bu təhdidlərdən, onların təhlükəsizliyini kim qoruyacaq? Biz keçid hakimiyyəti ilə danışırıq ki, Suriyanın bərpası üçün siyasi keçidlə bağlı gözləntilərimiz barədə çox aydın və sərt siqnallar verək", - deyə Fransa XİN rəhbəri bildirib.
Xatırladaq ki, yanvarın 3-də Suriyanın yeni administrasiya nümayəndələri ölkəyə elan olunmamış səfərlə gələn Almaniya XİN rəhbəri ilə əl sıxmaqdan imtina ediblər. Yayımlanan videoda görünür ki, Berbok hökumət təyyarəsinin trapından birinci düşür və Suriyanın yeni administrasiyasının nümayəndə heyətinə yaxınlaşır. Suriyalı siyasətçilər görüş zamanı əllərini sinələrinə qoyaraq nazir ilə əl sıxmaq niyyətində olmadıqlarını aydın şəkildə göstərirlər. Bir an sonra onlara alman nümayəndə heyətindən olan kişi yaxınlaşır və suriyalılar, əksinə, onunla həvəslə əl sıxırlar.
Daha sonra Dəməşqdəki görüşün nəticələrinə dair Suriyanın yeni hakimiyyəti tərəfindən dərc edilən fotoda Berbokun şəkilləri bulanıqlaşdırılıb. Fransalı həmkarı Barro ilə isə vəziyyət tamamilə fərqlidir. O, kişi olduğu üçün şəkillərdə Suriya siyasətçiləri və digər kişilərlə yanaşı heç bir redaktə olmadan təsvir edilib.
