Fransanın Paris yaxınlığındakı şəhərlərindən birində içərisində sərnişinlərin olduğu avtobus Sena çayına düşüb.
Oxu.Az xəbər verir ki, bu barədə "Daily Mail" nəşri məlumat yayıb. İlkin ehtimala əsasən, hadisəyə sükan arxasında olan təcrübəçi sürücünün idarəetməni itirməsi səbəb olub.
Xəbərə görə, nəqliyyat vasitəsində ümumilikdə dörd nəfər - təcrübəçi sürücü, təlimçi və iki sərnişin olub. Yoldan keçənlərin və təcili yardım xidmətlərinin operativ müdaxiləsi nəticəsində onların hamısı xilas edilib. Şahidlərin sözlərinə görə, avtobus idarəetmədən çıxarkən park edilmiş boş avtomobilə də çırpılıb və onu da özü ilə suya sürükləyib. Şəhər meri Lamiya Bensarsa Reda baş verənlərdən sarsıldığını bildirib:
"Həyatımda ilk dəfədir ki, belə bir mənzərə ilə qarşılaşıram. Deyəsən, bu, ömrümün ən pis günü idi".
O, çevik reaksiyaya görə polis və xilasedicilərə təşəkkürünü bildirib.
