Fransa Vətənpərvərlər Partiyasının sədri Florian Filippo 2027-ci il üçün nəzərdə tutulan prezident seçkisinə qatılmağı planlaşdırır.
Oxu.Az xəbər verir ki, siyasətçi bu qərarını "France 2" telekanalının canlı yayımında açıqlayıb.
"Bəli, mən prezidentliyə namizədliyimi irəli sürürəm. Bildirmək istəyirəm ki, indi 2021-ci illə müqayisədə daha yaxşı vəziyyətdəyəm. O vaxt qərarımı çox gec vermişdim və rəhbərlik etdiyim partiya kifayət qədər böyük deyildi", - deyə Filippo vurğulayıb.
Partiya lideri ötən seçki prosesində iştirakını rəsmiləşdirmək məqsədilə merlərdən imza yığarkən problemlərlə üzləşdiyini xatırladıb - o zaman lazım olan 500 imzadan sadəcə birini əldə edə bilmişdi. Siyasətçi bu dəfə daha uğurlu nəticələr göstərməyə və dövlətin ən ali postu üçün mübarizəyə qoşulmağa inanır. O, həmçinin bəyan edib ki, əgər qalib gələrsə, Fransanın NATO və Avropa İttifaqı sıralarından ayrılması istiqamətində qətiyyətli addımlar atacaq.
Qeyd edək ki, Fransada prezident seçkisinin ilk mərhələsi 2027-ci ilin aprel ayında keçiriləcək. Dəqiq gün hələ təsdiqlənməsə də, prosesin hazırkı dövlət başçısı Emmanuel Makronun vəzifə müddətinin başa çatacağı 13 may 2027-ci il tarixindən 20-35 gün öncə təşkil olunacağı ehtimal edilir. Namizədlərdən heç biri ilkin mərhələdə 50 faizdən artıq səs qazana bilməzsə, ən yüksək nəticə göstərən iki siyasətçi 14 gün sonra reallaşacaq ikinci turda mübarizəni davam etdirəcək.
