"Mayın 8-də saat 20:00-da 1985-ci il təvəllüdlü şəxs (kişi) Cəlilabad Rayon Mərkəzi Xəstəxanasının Təcili tibbi yardım şöbəsinə hospitalizasiya olunub".
Bu barədə Oxu.Az-ın sorğusuna cavab olaraq Tibbi Ərazi Bölmələrini İdarəetmə Birliyindən (TƏBİB) bildirilib.
Qeyd olunub ki, ona dəqiqləşdirilməmiş çoxsaylı açıq yaralar diaqnozu təyin edilib:
"Pasiyent cərrahi əməliyyata alınıb, hazırda vəziyyəti stabil qiymətləndirilir".
Məhərrəm Əliyev
Cəlilabad rayonunda baş verən bıçaqlanma hadisəsinin təfərrüatı məlum olub.
Oxu.Az-ın əldə etdiyi məlumatına görə, hadisə mayın 8-də axşam saatlarında rayonun Uzuntəpə kəndi ərazisində qeydə alınıb.
Uzuntəpə kənd sakini İlqar Quliyev 5-ci sinif şagirdi olan oğlunu döyən şəxsin evinə gedib. O, oğlunu döyən 9-cu sinif şagirdinin atası Nicat Cəbiyevi küçəyə çağıraraq, onunla mübahisə edib. Mübahisə zamanı İ.Quliyev N.Cəbiyevi yumruqla vurub və söyüb.
Hadisə zamanı N.Cəbiyev özü ilə götürdüyü mətbəx bıçağı ilə ona zərbələr endirib. O, İlqar Quliyevə qarın, döş qəfəsi və dirsək nahiyələrindən 11 bıçaq zərbələri endirərək onu öldürməyə cəhd edib.
Polis əməkdaşlarının keçirdikləri tədbirlərlə hadisəni törətməkdə şübhəli bilinən N.Cəbiyev saxlanılaraq istintaqa təhvil verilib.
Cəlilabad rayonunda bıçaqlanma hadisəsi baş verib.
Oxu.Az-ın məlumatına görə, hadisə mayın 8-də axşam saatlarında rayonun Uzuntəpə kəndi ərazisində qeydə alınıb.
Uzuntəpə kənd orta məktəbinin 5-ci sinif şagirdi ilə 9-cu sinif şagirdi arasında mübahisə yaranıb. Mübahisə nəticəsində 9-cu sinif şagirdi 5-ci sinif şagirdini döyüb, ona xəsarət yetirib.
Azyaşlı evə gələrək bu barədə valideynlərinə məlumat verib. 5-ci sinif şagirdinin atası İlqar Quliyev mübahisəni aydınlaşdırmaq məqsədi ilə 9-cu sinif şagirdinin evinə gedib və onun atası Nicat Cəbiyevlə görüşüb. Söhbət zamanı valideynlər arasında mübahisə yaranıb. Mübahisə nəticəsində N.Cəbiyev özü ilə götürdüyü mətbəx bıçağı ilə İlqar Quliyevə çoxsaylı bıçaq zərbələri endirərək onu öldürməyə cəhd edib.
Yaxınlıqdakı şəxslərin səyi nəticəsində dava sakitləşdirilib və İ.Quliyev ağır vəziyyətdə Cəlilabad Mərkəzi Xəstəxanasına çatdırılıb. Yaralı dərhal əməliyyat olunub, reanimasiya şöbəsinə yerləşdirilib.
Polis əməkdaşlarının keçirdikləri tədbirlərlə hadisəni törətməkdə şübhəli bilinən N.Cəbiyev saxlanılaraq istintaqa təhvil verilib.
Faktla bağlı araşdırma aparılır.
