Hindistanın Siliquri şəhərində xilasedicilərə təxminən 82 metr hündürlüyündəki telekommunikasiya qülləsinə çıxan kişini düşürmək üçün təxminən səkkiz saat vaxt lazım gəlib.
Oxu.Az-ın xəbərinə görə, bu barədə "The Times of India" nəşri yazıb.
Məlumata görə, danışıqlar zamanı o, qeyri-adi tələblər irəli sürüb, xüsusən də xaşxaş toxumlu qızardılmış balqabaq istəyib.
Kişini Kançanсunqa stadionunun yaxınlığındakı qüllənin başında görüblər. O, ayaqlarını sallayaraq konstruksiyanın üzərində oturub və enmək niyyətində olmayıb. Tezliklə hadisə yerinə polis, yanğınsöndürənlər, mülki müdafiə əməkdaşları və xilasedicilər gəliblər.
Yüksək hündürlük səbəbindən yerdən onunla əlaqə saxlamaq demək olar ki, mümkün olmayıb, ona görə də polis əlaqə qurmaq üçün dron işə salıb. Lakin gənci enməyə razı sala bilməyiblər.
Xilasedicilər güc tətbiq etməkdən və ya qəfil hərəkətlər etməkdən ehtiyat ediblər, çünki istənilən ehtiyatsız hərəkət yıxılmaya səbəb ola bilərdi. Buna görə də əməliyyata peşəkar alpinistlər cəlb edilib. Komanda kişinin yanına qalxıb və əvvəlcə onu özbaşına enməyə razı salmağa çalışıb. Bu cəhd uğursuz olduqda, onu xərəyə bənzər bir konstruksiyaya bərkidiblər və yavaşca aşağı endirməyə başlayıblar.
Əməliyyat başladıqdan təxminən 8 saat sonra onu təhlükəsiz şəkildə yerə çatdırmaq mümkün olub. Hindistanlı kişi müayinə edilməsi və müşahidə altında saxlanması üçün xəstəxanaya göndərilib.
