Ukraynada münaqişənin sülh yolu ilə nizamlanması üzrə xarici işlər nazirləri səviyyəsində aprelin 23-də Londonda baş tutacaq danışıqlar təxirə salınıb.
Oxu.Az-ın "The Guardian"a istinadən xəbərinə görə, bu barədə daha əvvəlki yayılmış xəbərləri Böyük Britaniya Xarici İşlər Nazirliyi təsdiqləyib.
"Ukrayna sülh danışıqları üzrə xarici işlər nazirlərinin görüşü təxirə salınıb. Ölkələrin rəsmi nümayəndələri səviyyəsində danışıqlar davam etdiriləcək, lakin bu danışıqlar mətbuata qapalı olacaq", - deyə XİN nümayəndəsi bildirib.
ABŞ dövlət katibi Marko Rubionun Londona getməkdən imtina etməsindən sonra Böyük Britaniya, Fransa, Almaniya və Ukraynanın xarici işlər nazirləri Ukrayna üzrə aprelin 23-də keçirilməsi planlaşdırılan görüşü təxirə salıblar.
Oxu.Az xəbər verir ki, bu barədə "Sky News" telekanalı məlumat verib.
Qeyd olunub ki, bunun əvəzinə beş ölkənin rəsmiləri arasında danışıqlar aparılacaq. Məlumata görə, Ukraynanın xarici işlər naziri Andrey Sıbiqanın hələ də Londonda olacağı və Böyük Britaniyanın xarici işlər naziri Devid Lemmi ilə görüşəcəyi gözlənilir.
