Yaxşı deyiblər, qonşuya ümid olan şamsız qalar. Düzdür, bu, hər qonşuya aid deyil, amma Azərbaycanın qonşu sarıdan demək olar ki, heç vaxt bəxti gətirməyib. Bir tərəfdən Ermənistan, bir tərəfdən son vaxtlar şovinist siyasətini intensivləşdirən Rusiya, indi də İsrail və ABŞ qarşısında əziləndən sonra hikkəsini üstümüzə tökən İran. O İran ki, eyni dini daşıyasan, amma içində əbədi nifrət gizlənə… Azərbaycan indi məhz belə bir mənzərə ilə üz-üzədir. İran adlanan rejim illərlə "müsəlman qardaşlığı" deyib, indi isə həmin ağızla yenə də ölkəmizə qarşı hücuma keçir. Sosial şəbəkələrin İran seqmentində ünvanımıza iftiralar səslənir, Azərbaycan Prezidenti və dövləti təhqir olunur. Açıq-aşkar "raket atarıq", "partladarıq" deyən profillər - hamısı birbaşa İran dövlətinin, şəxsən Ali lider Seyid Əli Xameneinin kölgəsindən çıxır. Bu artıq siyasət deyil, bu, terrorun rəsmiləşdirilmiş formasıdır.
Tehranın İran-İsrail münaqişəsi fonunda diqqətini açıq şəkildə Azərbaycanın üzərinə yönəltməsi artıq təsadüfi görünmür. Bu kampaniya sadəcə söz güləşdirməkdən ibarət deyil, burada həm ideoloji hücum, həm də birbaşa təhlükə mesajları yer alır. İran tərəfindən aparılan bu təbliğat həm daxildəki ictimai rəyi formalaşdırmağa, həm də Azərbaycanda siyasi təzyiq yaratmağa hesablanıb.
Təbii ki, bu kampaniyanın kökündə bir neçə əsas hədəf dayanır: Azərbaycanın İsraillə münasibətləri, türkdilli və müsəlman, amma İranın təsirindən kənar müstəqil siyasət aparan dövlət, Cənubi Azərbaycanda yaşayan milyonlarla azərbaycanlının milli kimliyi və Tehran rejiminin onlardan duyduğu narahatlıq.
Bu addımlar isə təkcə Azərbaycanın daxili sabitliyinə yox, bütövlükdə regionun təhlükəsizliyinə yönəlmiş bir təhdiddir.
Hazırda şahid olduğumuz vəziyyət İranın açıq-aşkar təxribatçı yanaşmasının daha sərt formaya keçdiyini göstərir. Sosial şəbəkələrdə yayılan materialların miqyası, dili və məqsədi göstərir ki, bu sadəcə spontan ifadələr deyil - koordinasiyalı, planlı və dövlət səviyyəsində dəstəklənən kampaniyadır.
Məsələn, iyunun 27-də İranın Ermənistandakı səfiri Mehdi Sobhaninin çıxışına nəzər salaq. Səfir rəsmi səviyyədə Azərbaycanın İsrailin İrana qarşı hücumlarında guya "iştirak" etməsi ilə bağlı ölkəmizin əleyhinə ittihamlar səsləndirdi. Bu isə nəinki əsassızdır, əksinə, dövlətlərarası münasibətləri pozmağa və Azərbaycana qarşı cəmiyyəti qızışdırmağa hesablanmış siyasi dezinformasiyadır. Səfir bəyanatında guya İsrailin Azərbaycanın hava məkanından istifadə edərək hücumlar təşkil etdiyini iddia edir. Halbuki, rəsmi Bakı dəfələrlə və aydın şəkildə bəyan edib ki, Azərbaycan ərazisi və hava məkanı heç bir qonşu ölkəyə qarşı hücum üçün istifadə edilə bilməz və edilməyib. Ən təhlükəli məqam isə ondan ibarətdir ki, İranın bu son kampaniyası sadəcə informasiya savaşı ilə məhdudlaşmır. Diplomatik nümayəndələrin ritorikasında birbaşa raket hücumları ilə təhdidlər, ölkə daxilində terror aktlarına çağırışlar, silsilə partlayışların törədilməsi ilə bağlı eyhamlar edilir. Bu isə artıq diplomatiyanın normativ çərçivələrdən çıxaraq, İran rejiminin terror ritorikasına keçdiyini açıq şəkildə göstərir. Azərbaycanın suverenliyinə, ərazi bütövlüyünə və daxili sabitliyinə qarşı belə ritorikaların səsləndirilməsi həm regionda, həm də beynəlxalq aləmdə İranın açıq təhlükə mənbəyi və terror ölkəsi olduğunu bir daha sübut edir. Bu, artıq təkcə Azərbaycan üçün deyil, bütövlükdə Cənubi Qafqaz və Yaxın Şərq üçün təhlükəli bir presedent yaradır. Belə davranışlar İranın terroru xarici siyasət alətinə çevirdiyini və bölgədə sabitliyi hədəf aldığını sübut edən yeni nümunələrdir.
Lakin İran bilməlidir ki, Azərbaycan heç vaxt təhdidə boyun əymir, heç nəyi suverenlik prinsiplərindən üstün tutmur. İran istədiyi qədər bağırsın, Azərbaycan öz yolundadır. Bizim müstəqilliyimiz, siyasətimiz və qərarlarımız Tehrandan yox, Bakının öz iradəsindən və xalqın gücündən doğur. Amma İran onu da unutmasın ki, sel gələndə qarşısını heç kim ala bilməz, əksinə, ən birinci qarşısını kəsən bəndi vurub dağıdar. Ermənistanı özünün "qırmızı xətti" elan edən molla rejimi ki, bunu yaxşı bilir!
Mərahim Nəsib
