İraq və Səudiyyə Ərəbistanı sərhədində ABŞ qoşunları göründü: İran hücuma keçir?

İraq və Səudiyyə Ərəbistanı sərhədində ABŞ Silahlı Qüvvələrinə məxsus hərbi texnika kolonlarının hərəkəti qeydə alınıb.

Bu barədə Oxu.Az Livanın "Al Mayadeen" telekanalına istinadən bildirir.

Məlumata görə, "Arar" nəzarət-buraxılış məntəqəsində bir neçə ABŞ hərbi konvoyu müşahidə edilib. Telekanalın qeyd etdiyi kimi, qoşunların yerləşdirilməsi İranın İsrailə gözlənilən hücumuna hazırlıqla bağlı ola bilər.

Xatırladaq ki, Yaxın Şərqdə vəziyyətin kəskin şəkildə pisləşməsi son günlərdə Fələstin radikal HƏMAS hərəkatının Siyasi Bürosunun rəhbəri İsmayıl Haniyənin Tehranda ölümündən və Beyrutda Livanın "Hizbullah" şiə hərəkatının hərbi qanadının komandirlərindən biri Fuad Şükürün zərərsizləşdirilməsindən sonra başlayıb.