İraq hüquq-mühafizə orqanları korrupsiya ilə bağlı aparılan araşdırmalar çərçivəsində İraq neft nazirinin müavini Adnan əl-Cumeylinin maliyyə maxinasiyaları işi üzrə təxminən 175 milyon dollar və 400 kiloqram qızıl müsadirə edib.
Oxu.Az "Al Hadath" telekanalına istinadən xəbər verir ki, bu barədə İraq Ali Məhkəmə Şurası məlumat yayıb.
"Bu günə qədər "əl-Cumeyli işi" üzrə 213 milyard dinar (təxminən 162.5 milyon dollar) və 12 milyon dollar nağd pul müsadirə edilib", - deyə məhkəmə qurumunun açıqlamasında bildirilib.
Bundan əlavə, araşdırma çərçivəsində ölkənin müxtəlif əyalətlərində gizlədilmiş yerlərdən 400 kiloqram qızıl aşkar edilərək götürülüb.
Eyni zamanda, İraqın INA agentliyi də eyni iş üzrə yeni müsadirələr barədə məlumat yayıb. Agentliyin məlumatına görə, istintaq orqanları əl-Cumeyli və onunla əlaqəli şəxslərin işi üzrə daha 27 milyard dinar (20.5 milyon dollardan bir qədər çox) vəsait götürüblər.
İraq məhkəməsinin məlumatına görə, qanunsuz əldə edilmiş pullar təqsirləndirilən şəxslərin həyata keçirdiyi layihələrdə vəsaitlərin mənimsənilməsi nəticəsində əldə olunub.
İyunun sonunda İraq təhlükəsizlik qüvvələri korrupsiya ittihamı ilə 47 yüksəkvəzifəli məmuru və parlament deputatını saxlayıb. Həmin vaxt hüquq-mühafizə orqanlarının müxtəlif vəzifələrdə çalışan məmurlar barəsində daha azı 200 həbs qərarı verdiyi bildirilmişdi.
