"Meta"nın rəhbəri Mark Zukerberq və "OpenAI" rəhbəri Sem Altman ABŞ Prezidenti Donald Trampın İlon Maskla münasibətlərinin kəskin pisləşməsi fonunda Ağ Ev rəhbəri ilə yaxınlaşmağa cəhd edirlər.
Oxu.Az bu barədə "Financial Times"a istinadla xəbər verir.
Bildirilir ki, Trampın "Big Beautiful Bill" adlı qanun layihəsini sərt tənqid edən Mask prezidentin narazılığına səbəb olub. Zukerberq və Altman bundan istifadə edərək Ağ Evə dəfələrlə baş çəkiblər, Tramp Administrasiyasına dəstək veriblər və öz süni intellekt layihələrinə dövlət dəstəyini təmin etmək üçün işlər görüblər.
Bununla bağlı Ağ Evdən paylaşılan sonuncu kadrlarda Zukerberqin Trampın yanında, Altmanın isə onun qarşısında oturduğu görünür.
Altman isə bu il prezidentlə Səudiyyə Ərəbistanına səfər edib və onun Böyük Britaniyaya dövlət səfərinə qatılıb.
Hazırda "Meta" və "OpenAI" ABŞ hökumətinin təsdiq edilmiş süni intellekt təminatçıları siyahısına əlavə edilib və ordunun onların süni intellekt texnologiyalarından istifadəsinə qoyulan məhdudiyyətlər aradan qaldırılıb.
Bundan başqa Zukerberq ABŞ-yə 2028-ci ilə qədər 600 milyard dollar sərmayə qoyacağını açıqlayıb. Bu da Trampa Çini geridə qoymaqla bağlı uğur mesajı vermək imkanı yaradıb.
