İsrail polisi Karmiel sakinini və onun ev yoldaşını Holokostdan sağ çıxan 93 yaşlı qadının ölümünü gizlətməkdə şübhəli bilərək saxlayıb. Onlar qadının payına düşən kompensasiya və sosial müavinətləri almağa davam edə bilmələri üçün onu öz evlərinin həyətində basdırıblar.
Oxu.Az-ın Segodnya.co.il-ə istinadən xəbərinə görə, bu barədə hüquq-mühafizə orqanlarından məlumat verilib.
Polisin məlumatına görə, axtarışlar bir neçə həftə davam edib və ərazidə qazılmış üçmetrlik çuxurda cəsədin aşkarlanması ilə nəticələnib. Qızın anasının yeri ilə bağlı təzadlı açıqlamalarından narahat olan qohumlar polisə müraciət ediblər və bundan sonra istintaq başlayıb. Saxlanılan şəxslər, həmçinin ehtimal edilən basdırılmanın tarixi və yeri ilə bağlı da qarışıq ifadələr veriblər, o cümlədən qadının 2024-cü ilin aprelində öldüyünü və "müharibə səbəbindən" başqa şəhərdə dəfn olunduğunu da iddia ediblər.
Eyni zamanda, istintaqın versiyasına görə, cəsəd dəfn edilməzdən əvvəl bir neçə gün ərzində sənaye məqsədli dondurucu kamerada saxlanılıb, qeyri-qanuni alınan ödənişlər isə yüzminlərlə şekel təşkil edə bilər. Polis bu hadisəni son illərin "ən şokedici hadisələrindən biri" adlandırır.
İstintaq müddətində həbsdə olan qızın vətəndaş nikahında olduğu əri intihar edib. Polisin sözlərinə görə, o, istintaqın cəsədin gizlədilməsində onun rolunu müəyyən etdiyini başa düşüb. Qadına qarşı dələduzluq, istintaqa mane olmaq və ölüm barədə məlumat verməmək maddələri üzrə ittiham irəli sürülüb.
