ABŞ-nin Kaliforniya ştatında polis İsrailin "Mazal Group" kosmetika şirkətinin fəaliyyəti ilə bağlı araşdırmaya başlayıb.
Oxu.Az "Ynetnews" nəşrinə istinadən xəbər verir ki, buna səbəb xüsusi müəssisədə yaşayan 30 yaşlı Viktor Çizolmun şikayəti olub.
O bildirib ki, mağaza əməkdaşları onu ticarət obyektinin arxa otaqlarına aparıb, çıxışı bağlayıb və bank hesabına giriş əldə etmək üçün ona psixoloji təzyiq göstəriblər. Nəticədə kişi təxminən 52 min dollar itirib.
Maliyyə sənədlərinə və çeklərə əsasən, satıcılar kosmetik vasitələrə və xüsusi işıq terapiyası aparatına görə onun hesabından 41 747 dollar çıxarıblar. Bundan əlavə, bank kartından iki əməkdaş üçün bəxşiş adı ilə 9 120 dollar köçürülüb. Çizolm istintaqa bildirib ki, satıcılar kredit kartını verməyənə və əməliyyatları təsdiqləməyənə qədər onun mağazadan çıxmasına icazə verməyiblər.
"Mazal Group" sistemli pozuntularla bağlı ittihamları rədd edib və hadisəyə görə məsuliyyəti bir əməkdaşın üzərinə qoyub. Şirkət Çizolma dəymiş zərəri ödəməyə razılaşıb, lakin bunun üçün ondan sosial şəbəkələrdə dərc etdiyi mənfi şərhləri və şikayətləri silməyi tələb edib.
