Maqnezium preparatlarını qəbul edərkən niyə kabuslar yarana bilər?
Oxu.Az-ın xəbərinə görə, bu barədə somnoloq Zoi Uilyams "Metro" nəşrinə müsahibəsində açıqlama verib.
O bu məşhur bioəlavə ilə yuxu keyfiyyəti arasındakı əlaqə barədə sosial şəbəkələrdə aktiv müzakirə olunan məsələlərdən danışıb.
Zoi Uilyamsın sözlərinə görə, maqneziumun canlı və aydın yuxugörmələrə səbəb olduğuna dair heç bir elmi sübut yoxdur. Lakin o qeyd edib ki, bu bioəlavə sinir sisteminin qorunmasında və yuxunun tənzimlənməsində mühüm rol oynayır. Buna görə də onu qəbul etdikdən sonra yuxular daha yaddaqalan ola bilər.
Bundan əlavə, həkim vurğulayıb ki, xroniki stres sürətli yuxu (REM) fazasının daha uzunmüddətli olmasına səbəb ola bilər.
"Canlı yuxugörmələr adətən REM yuxusu fazası ilə assosiasiya olunduğu üçün obrazlar həmişəkindən daha dolğun və ya yaddaqalan görünə bilər", - deyə Zoi Uilyams əlavə edib.
Somnoloq həmçinin diqqətə çatdırıb ki, böyük miqdarda maqnezium qəbulu heç də mütləq şəkildə yuxu keyfiyyətinin yaxşılaşması ilə əlaqəli deyil. Həkim qəbul edilən bütün bioloji aktiv qida əlavələrinin dozasına riayət etməyi tövsiyə edib. Əgər kabuslar müntəzəm olaraq yuxuya mane olursa, Zoi Uilyams terapevtə müraciət etməyi məsləhət görüb.
