Monakoda baş verən partlayış zamanı xəsarət alanların vəziyyəti açıqlanıb. Bildirilib ki, hadisə zamanı yaralanan kişi yanıq xəsarətləri və qəlpə yaraları alıb, onunla birlikdə olan qadın isə ayaqlarını itirib.
Oxu.Az xəbər verir ki, bu barədə "Nice-Matin" nəşri məlumat yayıb. Nəşr qeyd edir ki, hadisə nəticəsində qadının ayaqları qismən qopub, o, təcili olaraq xəstəxanaya çatdırılıb və aşağı ətrafı amputasiya edilib.
BFMTV telekanalı da partlayışdan sonra pilləkənlərin yanında ayaqları olmayan bir qadının uzandığı barədə məlumat yayıb.
Hadisə zamanı yaralanan daha bir gənc (şəxsiyyəti müəyyənləşdirilməyib) xəstəxanaya yerləşdirilib. Partlayış dalğasının təsirindən kənara atılan bu şəxs yanıq və əzilmə xəsarətləri alıb.
"Nice-Matin" və "Le Figaro" qəzetlərinin məlumatına əsasən, yaralılar arasında Ukraynanın sanksiyalar siyahısında olan ukraynalı oliqarx Vadim Yermolayev də var. "Le Figaro" bildirir ki, partlayış anında Yermolayev həyat yoldaşı və oğlu ilə birlikdə çoxmənzilli binada olub. Monakonun dövlət naziri Kristof Mirman BFMTV-yə açıqlamasında qeyd edib ki, ilkin olaraq məlum olan üç yaralıdan əlavə, daha dörd nəfər də xəstəxanaya yerləşdirilib.
