Almaniyada "İnterpol" tərəfindən iş adamı Vadim Yermolayevə qarşı sui-qəsdin əsas şübhəlisi kimi axtarılan Ukrayna vətəndaşı Anastasiya Berezovskayanın mənzilində axtarış aparılıb.
Oxu.Az xəbər verir ki, bu barədə "Spiegel" nəşri məlumat yayıb.
Frankfurt-Mayn Prokurorluğu və Hessen əyalətinin Cinayət Polisi İdarəsinin birgə bəyanatında bildirilib ki, xüsusi təyinatlı polis əməkdaşları Berezovskayanın Main-Taunus rayonunda yaşadığı mənzildə və istifadə etdiyi avtomobildə yoxlama aparıblar. "Spiegel"in məlumatına görə, Luqansk vilayətindən olan Berezovskaya 2022-ci ilin martından Almaniyada yaşayır və müvəqqəti müdafiə statusu alıb. O, ilk vaxtlar qaçqınların yerləşdirilmə mərkəzində məskunlaşıb.
Xatırladaq ki, iyulun 3-də "İnterpol" 39 yaşlı Ukrayna vətəndaşı Anastasiya Berezovskayanı Monakoda partlayıcı qurğu yerləşdirməkdə şübhəli bilinən şəxs kimi beynəlxalq axtarışa verib. Hadisə nəticəsində Ukraynanın sanksiyalara məruz qalmış iş adamı Vadim Yermolayev və yaxınları ağır xəsarət alıblar.
Daha sonra məlum olub ki, Berezovskaya Monakodakı hadisədən sonra Frankfurtda görünüb. KİV-in məlumatına görə, o, Almaniyaya İtaliya üzərindən icarəyə götürülmüş avtomobillə gəlib.
İyunun 29-u axşam saatlarında Monakoda baş verən partlayış nəticəsində üç nəfər xəsarət alıb, onlardan ikisinin vəziyyəti ağırdır. Zərərçəkənlərin Vadim Yermolayev və yaxınları olduğu bildirilsə də, Monako Prokurorluğu onların şəxsiyyətini hələ də rəsmi şəkildə təsdiqləməyib.
Qeyd edək ki, Yermolayev Dneprdən olan iş adamı, "Alef" ticarət-istehsalat korporasiyasının təsisçisi və şəhərin ən iri tikinti şirkətlərindən birinin sahibidir. O, əvvəllər "Forbes" jurnalının "Ukraynanın 100 ən varlı şəxsi" siyahısına daxil edilib, 2019-cu ildə isə Ukrayna vətəndaşlığından imtina edərək Kipr pasportu alıb.
Monako polisi knyazlıqda baş vermiş partlayışla əlaqədar iki kişini saxlayıb.
Oxu.Az xəbər verir ki, bu barədə BFMTV telekanalı prokurorluğa istinadən məlumat yayıb.
Qurumdan bildirilib ki, axtarışda olan Ukrayna vətəndaşı bu əməli təkbaşına törətməyib. Saxlanılan şəxslərin sözügedən cinayətdə iştirak dərəcəsi hələ müəyyənləşdirilməlidir. Qeyd edək ki, istintaq tədbirləri üç nəfərin xəsarət aldığı 29 iyun partlayışından sonra həyata keçirilir.
Xatırladaq ki, daha əvvəl İnterpol bu işlə bağlı 39 yaşlı Ukrayna vətəndaşı Anastasiya Berezovskayanı beynəlxalq axtarışa vermişdi. Onun partlayışın təşkilində əsas şübhəli şəxs olduğu ehtimal edilir.
Monakoda partlayışın təşkilində şübhəli bilinən qadının Almaniyada olduğu bildirilir.
Oxu.Az xəbər verir ki, bu barədə məlumatı BFMTV telekanalı yayıb.
Bildirilib ki, qadın hələlik həbs edilməyib. Monako polisinin verdiyi informasiyaya görə, həmin şəxs kişi kimi görünmək məqsədilə xarici görünüşünü dəyişə bilər.
"Le Figaro" qəzeti bundan əvvəl partlayışın Almaniyada yaşayan Ukrayna vətəndaşı tərəfindən törədilə biləcəyini yazmışdı.
İyunun 29-da yerli vaxtla saat 21:00-da (Bakı vaxtı ilə saat 23:00) Monakoda yaşayış binasının girişində partlayışın baş verməsi barədə məlumatlar yayılıb. Xəsarət alan üç nəfərin vəziyyətinin ağır olduğu bildirilir. Ölkənin dövlət naziri (hökumət başçısı) Kristof Mirmanın sözlərinə görə, bu hadisə knyazlıq tarixində qeydə alınan ilk terror aktıdır.
