Monakoda ukraynalı iş adamı Vadim Yermolayevin qətlinə cəhd sifarişçilərə 150 000 dollara başa gəlib.
Oxu.Az-ın xəbərinə görə, bu barədə "Strana" nəşri məlumat verib.
Nəşr qeyd edir ki, bu məbləğdən 8 000 dolları Yermolayevə sui-qəsddə şübhəli bilinən Anastasiya Berezovskayanın özü götürüb, daha 5 000 dollar isə nəqliyyat xərclərinə sərf edilib. Pullar Berezovskayanın kriptovalyuta və bank hesablarına köçürülüb.
"Strana" iddia edir ki, bu məlumatlar Anastasiya Berezovskayanın qətli ilə bağlı saxlanılan şübhəlilərin ifadələrinə istinad edən hüquq-mühafizə orqanları mənbələrindən əldə edilib. Eyni zamanda, cinayəti sifariş edən şəxsin adı hələ ki açıqlanmır.
Qeyd olunur ki, Ukrayna Müdafiə Nazirliyinin Baş Kəşfiyyat İdarəsinin saxlanılan zabiti PUA zərbələri üzrə ixtisaslaşmış 9-cu Kəşfiyyat departamentində çalışıb. Ali Radanın deputatı Aleksey Qonçarenko, öz növbəsində, onun soyadının Reut olduğunu bildirib. Deputatın sözlərinə görə, o, Berezovskayanı başqa şəxslə birlikdə öldürdüyünü etiraf edib.
Ukrayna Milli Polisi, Ukrayna Təhlükəsizlik Xidməti, Ukrayna Baş Kəşfiyyat İdarəsi və Baş Prokurorun Ofisi Monakoda iş adamı Vadim Yermolayevin ailəsinə qarşı sui-qəsd cəhdi ilə bağlı İnterpol tərəfindən axtarılan qadını öldürməkdə şübhəli bilinən iki nəfəri saxlayıb.
Oxu.Az-ın Ukrayna KİV-ə istinadən xəbərinə görə, ölkənin hüquq-mühafizə orqanlarının əməkdaşları daha əvvəl Ukrayna vətəndaşı Anastasiya Berezovskaya adlı həmin qadının cəsədinin tapılması barədə məlumatı təsdiqləyiblər. O, Monako Knyazlığının hüquq-mühafizə orqanları tərəfindən üç nəfərin, o cümlədən bir uşağın yaralanmasına səbəb olan qəsdən adam öldürməyə cəhddə şübhəli bilinir.
Ukrayna hüquq-mühafizə orqanları bu faktla bağlı 1 iyul 2026-cı ildə məhkəməyəqədər araşdırmaya başlayıb.
Hüquq-mühafizə orqanlarının əməkdaşlarının məlumatına görə, şübhəli Berezovskaya 1 iyulda Ukraynaya gəlib.
İstintaq və əməliyyat tədbirləri zamanı onun əlaqə saxladığı şəxslərin dairəsi və hərəkət marşrutları müəyyən edilib.
İstintaq müəyyən edib ki, Anastasiya Berezovskaya Ukraynaya qayıtdıqdan sonra qohumları və iki kişi ilə ünsiyyətdə olub. Birincisi keçmiş hüquq-mühafizə orqanının keçmiş əməkdaşı, ikincisi isə Ukrayna Müdafiə Nazirliyinin Baş Kəşfiyyat İdarəsinin hazırkı əməkdaşı olub.
Hər iki şübhəli barəsində təxirəsalınmaz istintaq (axtarış) hərəkətləri həyata keçirilib və bu tədbirlər zamanı Müdafiə Nazirliyinin Baş Kəşfiyyat İdarəsinin hazırkı əməkdaşı digər fiqurantla birgə Berezovskayanın qətlini törətdiyini bildirib. O, həmçinin qeyd edib ki, Berezovskaya ilə əlaqələri, ona pul köçürmələri və ya istənilən digər hərəkətləri barədə öz rəhbərliyinə məlumat verməyib və öz düşüncəsinə əsasən hərəkət edib.
Həmçinin keçmiş hüquq-mühafizə orqanlarının keçmiş əməkdaşının yaşayış yerində aparılan axtarış zamanı işgəncə otağına bənzəyən zirzəmi aşkar edilib. Bu tapıntı saxlanılanların digər cinayətlərdə də iştirakı ilə bağlı istintaq qarşısında əlavə suallar doğurur.
Hər iki fiqurant (şübhəli) bir qrup şəxs tərəfindən əvvəlcədən əlbir olmaqla qətl törətməkdə şübhəli bilinərək saxlanılıb.
Əlbirlərdən birinin ifadəsinə əsasən istintaq eksperimenti aparılıb və bu zaman Berezovskayanın başından güllə yaraları olan cəsədi, eləcə də tapança gilizləri tapılıb.
İstintaq davam edir.
Hüquq-mühafizə orqanlarının əməkdaşları əlavə ediblər ki, Ukrayna tərəfinin əlində olan bütün məlumatlar Monako Knyazlığının istintaq orqanlarına təhvil verilib. Baş Prokurorun Ofisi Monako Knyazlığının hüquq-mühafizə orqanları ilə sıx əməkdaşlıq edir.
Hüquq-mühafizə orqanları Monakoda ailənin qətlinə cəhddə iştirak edən sifarişçiləri və digər fiqurantları müəyyən edir.
Monakoda ukraynalı oliqarx Vadim Yermolayevə qarşı terror aktında şübhəli bilinən qadının cəsədi Kiyev yaxınlığında basdırılmış vəziyyətdə tapılıb.
Oxu.Az-ın xəbərinə görə, qalıqların tapılması barədə "Ukrainskaya Pravda" nəşri Ukrayna hüquq-mühafizə orqanlarındakı mənbələrə istinadən məlumat verib.
"Qadının cəsədi 6 iyul saat 23 radələrində tapılıb. Ehtimallara görə, qadını güllələyiblər", - deyə bildirilib.
Həmçinin iki şübhəlinin saxlanıldığı bildirilir. Onlardan biri Ukrayna Baş Kəşfiyyat İdarəsinin hazırkı zabiti, digəri isə hüquq-mühafizə orqanlarının keçmiş əməkdaşıdır. Eyni zamanda məlumdur ki, qadın 22 mart 2025-ci ildən 1 iyul 2026-cı ilə qədər Ukrayna hüdudlarından kənarda olub.
Xatırladaq ki, iyunun 29-da axşam Monakoda yaşayış binasında əldəqayırma partlayıcı qurğu işə düşüb və partlayış baş verib. Knyazlığın tarixində ilk belə hadisə olan terror aktı nəticəsində Vadim Yermolayev və onu müşayiət edən Anna Nasobina ağır yaralanıb, o cümlədən onların 13 yaşlı oğulları da yüngül xəsarətlər alıb.
Daha sonra sui-qəsd cəhdində şübhəli bilinən şəxsin ukraynalı qadın olduğu müəyyən edilib. Təxminən 30 yaşında olduğu bildirilən qadın cinayətdən sonra Fransanın Bosoley kommunasına gedib, daha sonra isə əlbirləri ilə birlikdə İtaliyaya qaçıb.
