Ankarada keçirilən NATO-nun 36-cı sammitində maraqlı hadisə yaşanıb.
Oxu.Az xəbər verir ki, bu barədə "CNN Türk" məlumat yayıb. Bildirilib ki, Çexiyada Prezident Petr Pavel və Baş nazir Andrey Babiş arasında yaranmış təmsilçilik böhranı NATO Zirvə toplantısında da bütün dünyanın diqqət mərkəzində olub. Məlumata görə, məhkəmənin qərarı ilə Ankaraya yollanarkən belə Pavel və Babiş fərqli təyyarələrdən istifadə ediblər. Qeyd olunub ki, NATO-ya üzv dövlətlərin toplantıda vahid lider və nümayəndə heyəti ilə iştirakı gözlənildiyi halda, Çexiya Ankaraya iki müxtəlif rəhbərlə gələrək tədbirin ən çox müzakirə olunan ölkəsinə çevrilib. Baş nazir Andrey Babiş tədbirdən əvvəl verdiyi bəyanatda Çexiyanı Ankarada şəxsən özünün təmsil edəcəyini bildirib. Nümayəndə heyətində müdafiə naziri və xarici işlər nazirinin olacağını qeyd edən Babiş Prezident Petr Paveli nümayəndə heyətinə daxil etməyib. Bu addımdan sonra Prezident Pavel konstitusion hüquqlarının pozulduğunu bildirərək məsələ ilə bağlı Konstitusiya Məhkəməsinə müraciət etdi.
Məhkəmə qəbul etdiyi qabaqlayıcı tədbir qərarı ilə Prezident Pavelin də NATO Sammitinə qatılmasına şərait yaradıb.
Bundan başqa iki rəhbər arasındakı siyasi ziddiyyət NATO-nun ənənəvi xatirə şəklinə də təsir edib. Şəkil çəkilişi zamanı Petr Pavel və Andrey Babişin yanaşı dayanmadığı, protokol qaydalarına uyğun olaraq səhnənin iki fərqli küncündə yer aldığı müşahidə edilib.
