ABŞ-nin Nyu-York şəhərində, Manhettenin mərkəzində yerləşən 38 mərtəbəli ofis binasının bir neçə mərtəbəsində əyilmə qeydə alınıb, yaxınlıqdakı bir neçə binanın sakinləri təxliyə edilib.
Oxu.Az xəbər verir ki, bu barədə ABC telekanalı məlumat yayıb.
Məlumata görə, əvvəllər "Pfizer" əczaçılıq şirkətinin baş qərargahı olmuş binanın yaşayış binasına çevrilməsi məqsədilə yenidənqurma işləri aparılır.
Yerli hökumət orqanlarının bildirdiyinə görə, təmir işləri səbəbindən binanın 21-ci mərtəbəsindən 26-cı mərtəbəsinədək olan hissədə yüklənmənin təsiri nəticəsində əyilmə baş verib.
Nyu-York meri Zohran Mamdaninin sözlərinə görə, hadisə nəticəsində xəsarət alan olmayıb, ofis binası tam təxliyə edilib. Bundan əlavə, yaxınlıqdakı hündürmərtəbəli binalardan, eləcə də təxminən 400 şagirdin təhsil aldığı məktəbdən də insanlar çıxarılıblar.
