Pakistanın müdafiə naziri: "İslamabadın Hindistandakı terror hücumu ilə heç bir əlaqəsi yoxdur"

Hindistan hakimiyyəti "Ləşkər-e-Taybə" radikal qruplaşmasının terrorçuları ilə Pakistan arasında əlaqəyə dair sübut təqdim etməyib, Nyu-Dehli bölgədəki vəziyyətin destabilizasiyası üçün terror hücumundan istifadə edib.

Oxu.Az xəbər verir ki, bu fikri Pakistanın müdafiə naziri Xavaca Asif "Sky News" telekanalına müsahibəsində bildirib.

"Onlar (Hindistan hakimiyyəti - red.) Pakistanı nədəsə sadəcə ittiham etmək və öz maraqlarına uyğun vəziyyət yaratmaq üçün heç vaxt heç bir sübut təqdim etməyiblər. Bizim buna dəxlimiz yoxdur. Bizim bununla heç bir əlaqəmiz yoxdur", - deyə nazir əmin edib.

Onun qiymətləndirməsinə görə, "Ləşkər-e-Taybə" qruplaşması Pakistan ərazisində fəaliyyət göstərmir - ABŞ və Hindistan kəşfiyyat xidmətləri heç bir sübut olmadan yanlış nəticələr çıxarıblar. Nazir əlavə edib ki, Pakistanın təhlükəsizlik orqanları hər şeyin regionda sabitliyi pozmaq məqsədi ilə səhnələşdirildiyini müəyyən ediblər.