"Pəncələrin fəaliyyətində yaranan pozuntular təkcə qamətə və oynaqlara deyil, həm də alt çənənin vəziyyətinə təsir edə bilər".
Oxu.Az xəbər verir ki, bunu "İzvestiya"ya rusiyalı travmatoloq-ortoped Mixail İqnatov deyib.
Mütəxəssisin sözlərinə görə, qeyri-düzgün dişləmə heç də həmişə təkcə stomatoloji problem sayılmır. Bəzi hallarda onun inkişafı dayaq-hərəkət aparatının iş xüsusiyyətləri, o cümlədən yastıpəncəliklə sıx bağlı ola bilər. Pəncələr orqanizmin biomexaniki sisteminin özülü hesab olunur: onlar amortizasiya funksiyasını yerinə yetirərək yükün bərabər paylanmasına kömək edir. Pəncə tağlarının yastılaşması zamanı hərəkət mexanikası dəyişir, diz və çanaq-bud oynaqlarına düşən yük artır, onurğa sütunu isə yaranan disbalansı kompensasiya etməyə başlayır.
"Orqanizm vahid bir sistemdir, buna görə də bir nahiyədəki dəyişikliklər çox vaxt digərlərinin işində öz əksini tapır. Əzələlərin, onurğanın və gicgah-çənə oynağının sıx qarşılıqlı əlaqəsi səbəbindən qamətdəki dəyişikliklər alt çənənin vəziyyətinə də təsir edə bilir. Nəticədə insanda dişləmə pozuntuları yarana və ya arta, həmçinin çeynəmə, yaxud ağzı açma zamanı diskomfort hiss edilə bilər", - deyə İqnatov qeyd edib.
Həkimin fikrincə, dişləmənin korreksiyası bütün dayaq-hərəkət aparatının vəziyyəti nəzərə alınmaqla aparılmalıdır. Əgər pozuntuların səbəbi biomexaniki disbalansdırsa, təkcə ortodontik müdaxilə kifayət etməyə bilər. Belə hallarda müxtəlif mütəxəssislərin iştirakı ilə pəncələrin, onurğanın və qamətin vəziyyətinin kompleks diaqnostikası tələb olunur.
Yastıpəncəlik tədricən inkişaf edir və uzun müddət özünü qabarıq simptomlarla büruzə verməyə bilər. Ayaqların tez yorulması, gəzintidən və ya uzun müddət ayaq üstə qalmaqdan sonra yaranan ağırlıq hissi, eləcə də pəncə, diz və bel nahiyəsindəki ağrılar mümkün pozuntulardan xəbər verə bilər.
Həkim problemlərin profilaktikası üçün ayaqqabının düzgün seçilməsini, normal bədən çəkisinin qorunmasını, pəncə və baldır əzələlərinin müntəzəm olaraq möhkəmləndirilməsini, həddindən artıq hündür dabanlardan və tamamilə düzaltlıqlı ayaqqabılardan uzun müddət istifadənin məhdudlaşdırılmasını tövsiyə edib. Ayaq pəncələrinin vəziyyətinə vaxtında diqqət yetirmək düzgün qaməti qorumağa kömək edir və dişləməyə mənfi təsir edə biləcək riskləri azaldır.
