Polşada arxeoloqlar uşaqların dəfn olunduğu məzarlar aşkar ediblər və bu uşaqların "vampir" hesab edilmiş ola biləcəkləri ehtimal olunur.
Oxu.Az bildirir ki, bu barədə "GreWi" portalı məlumat verib.
Məlumata görə, Pen şəhərindəki qəbiristanlıqda başıaşağı basdırılmış uşağın skeleti aşkar edilib. Onun ayaqları dəmir çubuqla yerə bərkidilib. Ötən il arxeoloqlar içərisində "vampir uşaq"ın qalıqları olan başqa bir məzar da tapmışdılar - basdırılmış şəxsin çiyinlərinin üzərinə ağır daşlar qoyulmuşdu.
Materialda qeyd olunur ki, alimlər tapıntıları qəti şəkildə vampirlərdən qorunmağa yönəlmiş dəfn ayinləri kimi şərh etmək istəmirlər. Onlar bunun digər sehrli-dini ayinlərlə bağlı ola biləcəyini də ehtimal edirlər.
Daha əvvəl isə tarix elmləri doktoru Vladimir Petruxin bildirmişdi ki, Pen kəndi yaxınlığındakı qəbiristanlıq 2022-ci ildə tikintidən əvvəl aparılan işlər zamanı təsadüfən aşkar edilib. Onun sözlərinə görə, qəbiristanlıq yolayrıcının yaxınlığındakı təpənin yamacında, yəni işıqlandırılmayan bir yerdə yerləşirdi. Adətən bidətçilər, yadlar, boğulanlar və vəftiz olunmamış uşaqlar bu şəkildə dəfn edilirdilər.
Petruxin qeyd edib ki, məzarda ayağında qıfıl və boynunun üzərində oraq olan "vampir qız"ın qalıqları da tapılıb. Alim izah edib ki, zorakılıq nəticəsində ölən şəxsi vampir hesab edə bilərdilər.
