"Qırılmış qəlb sindromu" şiddətli stres, o cümlədən doğmaların itkisi, ayrılıq və digər sarsıdıcı hadisələr nəticəsində yaranan ciddi kardioloji problemdir. Şotlandiyalı Brenda Yanq dünyada bu xəstəliyin yeni müalicə üsullarını sınaqdan keçirən ilk pasiyentlər sırasındadır.
Oxu.Az xəbər verir ki, bu qeyri-adi tibbi mövzu ilə bağlı "People" nəşri geniş məqalə dərc edib.
Şotlandiyanın Aberdinşir qraflığında yaşayan 57 yaşlı sosial işçi Brenda Yanq əvvəllər hər zaman həyatsevər və gümrah olduğunu bildirib. Lakin anasının qəfil vəfatı hər şeyi kökündən dəyişib.
"Yalnız onu xatırlayıram ki, beynimdə "Bu hadisə bu gün ola bilməz!" düşüncəsi fırlanırdı", - deyə Brenda öz ağır xatirələrini bölüşüb.
Qadın anasının ölüm xəbərini eşitdiyi an sinəsində "kəskin və dözülməz ağrı" hiss etdiyini vurğulayıb. Həkimlər ilk olaraq bunun miokard infarktı olduğunu güman etsələr də, əlavə yoxlamalar nəticəsində pasiyentə "qırılmış qəlb sindromu", yəni Takotsubo kardiomiopatiyası diaqnozu qoyulub.
Bir müddət sonra Şotlandiyanın Aberdin Universitetinin tədqiqatçıları qadını analoji sindromdan əziyyət çəkən daha 100 pasiyentlə birlikdə klinik araşdırmalarda iştirak etməyə dəvət ediblər.
Məlumata görə, bu araşdırma prosesi düz yeddi il davam edəcək. Sınaqlar zamanı mütəxəssislər spesifik preparatların sözügedən xəstəliyin müalicəsindəki effektivliyini yoxlayacaqlar. Sınaqdan keçirilən əsas vasitələr qan damarlarının genişlənməsinə və rahatlaşmasına kömək edən renin-angiotenzin sisteminin (RAS) inhibitorlarından ibarətdir.
Layihənin rəhbəri, professor Dana Douson mövzu ilə bağlı mühüm məqamlara toxunub:
"Hazırda Takotsubo sindromu olan pasiyentlər tibbi baxımdan qeyri-müəyyənlik içindədirlər. Çünki bu xəstəliyin rəsmi təsdiqlənmiş vahid terapiya metodu yoxdur və müalicə taktikası hər bir xəstəyə görə fərdi seçilir. Bizə məlumdur ki, belə ağır emosional tutmalardan sonra insanların həyat keyfiyyəti ciddi şəkildə aşağı düşür. İlk dəfə olaraq, tətbiq etdiyimiz bu preparatların ölüm hallarının, infarkt, insult, ürək çatışmazlığı və təkrar Takotsubo hücumlarının qarşısını almaq gücünü elmi şəkildə sınaqdan keçirəcəyik".
