Hazırkı El-Ninyo təbii fenomeni böyük ehtimalla 2026-cı ilin dekabr ayında özünün pik gücünə çatacaq, ardınca isə 2027-ci ilin fevralından may ayınadək yavaş-yavaş zəifləmə mərhələsinə qədəm qoyacaq.
Oxu.Az xəbər verir ki, bu barədə "RİA Novosti"yə müsahibəsində Yeni Cənubi Uels Universitetinin dosenti və ARC "XXI Əsrin Havası" Tədqiqat Mərkəzinin eksperti, iqlimşünas Andrea Taşetto məlumat verib.
El-Ninyo Sakit okeanın ekvator zolağında suların temperaturunun qeyri-adi dərəcədə artması ilə müşahidə edilən iqlim anomaliyasıdır. Bu proses atmosferlə okean arasındakı tarazlığı pozaraq qlobal miqyasda iqlim dəyişikliklərinə yol açır. Nəticədə, bəzi bölgələrdə şiddətli quraqlıq riski artır, digər ərazilərdə isə güclü yağıntılar və rütubətli hava şəraiti qeydə alınır.
Mütəxəssisin sözlərinə görə, tarixi müşahidələr göstərir ki, El-Ninyo adətən təqvim ilinin sonunda pik həddinə çatır, Şimal yarımkürəsində isə qışın sonu və yaz aylarında tədricən sönür. Taşetto qeyd edib ki, indiki hadisə klassik ssenari üzrə inkişaf edir və proqnozlaşdırılan mərhələlərdən - güclənmə, pik nöqtə və zəifləmə - keçəcək.
İqlimşünas artıq indidən El-Ninyonun minimum 2026-cı ilin sonlarına qədər aktiv olacağını sübut edən göstəricilərin mövcud olduğunu vurğulayıb. Xüsusilə Sakit okeanın tropik qurşaqlarında su səthinin temperaturu proqnozlaşdırılan normanı üstələyir və prosesin inkişafı fonunda bu göstəricilərin daha da yüksələcəyi ehtimal olunur.
