Papa Fransiskin dəfn ediləcəyi yer açıqlandı

Roma Papası Fransisk Romadakı Santa Mariya Macore kilsəsində dəfn ediləcək.

Bu barədə Oxu.Az TASS agentliyinə istinadən xəbər verir.

Bildirilir ki, dəfn vida mərasiminin nə qədər davam edəcəyindən və nə vaxt başlayacağından asılı olacaq. Bundan sonra nəşin daşınması təşkil edilməlidir.

Papanın cümədən bazara qədər olan dövr ərzində dəfn ediləcəyi bildirilir. Bu tarix seçimi mövcud qaydalara əsaslanır. Qaydalara görə, nəşin dəfni ölümdən 4-6 gün sonra həyata keçirilməlidir.

Konkret tarix çərşənbə axşamı bir araya gələcək kardinallar tərəfindən müəyyən ediləcək.

Qeyd edək ki, Papa Fransisk hələ bir neçə il əvvəl Santa Mariya Macore kilsəsində dəfn olunmaq istədiyini bəyan etmişdi.

20:04

"Bütün dindarlar tərəfindən ehtiramın göstərilməsi üçün Roma Papası Fransiskin nəşinin aprelin 23-ü səhər saatlarında bazilikaya köçürülməsi baş tuta bilər".

Oxu.Az "Ansa" agentliyinə istinadla xəbər verir ki, bunu Vatikanın Mətbuat Xidmətinin direktoru Matteo Bruni deyib.

Onun sözlərinə görə, nəşin köçürülməsi sabah ilk Kardinallar Konqreqasiyasından sonra müəyyən ediləcək prosedurlara uyğun həyata keçiriləcək və bu barədə əlavə məlumat veriləcək.

Xatırladaq ki, Roma Papası Fransisk bu gün 88 yaşında dünyasını dəyişib.