Rumıniyada prezident seçkisinin ikinci turunun ləğvi üçün şikayət verildi

Rumıniyanın Konstitusiya Məhkəməsi "Rumınların birliyi uğrunda Alyans"ın lideri Corc Simionun prezident seçkisinin ikinci turunun nəticələrinin ləğvi ilə bağlı verdiyi şikayəti qeydə alıb.

Oxu.Az xəbər verir ki, bu barədə "Digi24" telekanalı mənbələrə istinadən məlumat verib.

Qeyd olunur ki, Konstitusiya Məhkəməsi namizədin şikayəti üzrə məhkəməni mayın 22-də keçirə bilər. Həmin gün orqan mayın 18-də keçirilən seçkinin ikinci turunun nəticələrini təsdiq etməyi planlaşdırır.

Xatırladaq ki, daha əvvəl Simion səsvermənin nəticələrinə görə Konstitusiya Məhkəməsinə şikayət edəcəyini bildirmişdi. Onun sözlərinə görə, seçki zamanı saxtalaşdırma mexanizmi mövcud olub. Simion Moldova hakimiyyətinin seçki turizmindən istifadə etdiyini iddia edir. Alyansın lideri "Telegram"ın həmtəsisçisi Pavel Durovun ifadəsinə istinad edərək, Fransanın da seçkiyə müdaxilə etdiyini bildirib.