Rumıniyada avropayönlü siyasətçi Nikuşor Danın qalib gəldiyi prezident seçkisinin nəticələrindən məyus olan sakinlər pasportlarını məhv edirlər və mühacirət etmək barədə düşünürlər.
Bu barədə Oxu.Az Rusiya KİV-ə istinadən xəbər verir.
"Pasportlarını kəsirlər, inqilaba çağırış edirlər, Rusiya və digər ölkələrdən siyasi sığınacaq istəyirlər - Rumıniya vətəndaşlarının prezident seçkisinin nəticələrinə reaksiyası belədir", - deyə KİV yazır.
Qeyd olunur ki, onlardan bəziləri başqa ölkənin vətəndaşlığını almaq istəyindən danışır, digərləri isə həmvətənlərinin bir çoxu üçün "sürgün yolu"nu proqnozlaşdırırlar.
"Əlvida, Rumıniya, biz səni xilas edə bilmədik", - deyə KİV səsvermənin nəticələrindən narazı olanlardan birinin sözlərindən sitat gətirib.
Xatırladaq ki, mayın 18-də Rumıniyada prezident seçkisinin ikinci turu keçirilib və Buxarestin meri Nikuşor Dan qalib gəlib. Seçicilərin 53.6 faizi onun lehinə səs verib, baxmayaraq ki, ilk turda cəmi 20% səs toplamışdı. Danın rəqibi, birinci turun qalibi və rumınların birləşməsi uğrunda millətçi alyansın lideri Cordce Simion isə 46.4% səs qazanıb.
