Rusiyanın Volqoqrad vilayətindəki 19 saylı islah koloniyasında (İK) girov götürülmə zamanı səkkiz nəfər ölüb.
Oxu.Az xəbər verir ki, bu barədə "Baza" "Telegram" kanalı məlumat yayıb.
Məlumata görə, terrorçular dörd məhbusu qətlə yetiriblər. Koloniyaya edilən hücumdan sonra onlar əlləri bağlı vəziyyətdə tapılıblar. Hücum zamanı həmçinin islah koloniyasının üç əməkdaşı - tədris şöbəsinin müdiri, mühafizə şöbəsinin rəisi və mühafizə və əməliyyat işləri üzrə rəis müavini qətlə yetirilib.
Ölən dördüncü əməkdaş çoxsaylı bıçaq xəsarətləri və qapalı kəllə-beyin travması alıb, daha sonra tibb müəssisəsində dünyasını dəyişib.
Avqustun 23-də Volqoqrad vilayətinin Surovikino şəhərində İK-19-un dörd məhbusu səkkiz koloniya əməkdaşını və dörd məhkumu girov götürüb. İslah koloniyasının dörd əməkdaşı bıçaq xəsarətləri alıb.
Xüsusi təyinatlılar girovların azad edilməsi üçün əməliyyat keçiriblər. Hücum zamanı bütün cinayətkarlar məhv edilib. Xüsusi təyinatlılar arasında itki yoxdur.
Rusiyanın Volqoqrad vilayətindəki 19 saylı islah koloniyasının dörd əməkdaşı öldürülüb.
Oxu.Az xəbər verir ki, bu barədə TASS-a Rusiya Federal Penitensiar Xidmətindən (FPX) məlumat verilib.
"Rusiya FPX-in Volqoqrad vilayətindəki İK-19-da dörd cinayətkar koloniyanın səkkiz əməkdaşını və dörd məhkumu girov götürüb. Cinayətkarlar dörd əməkdaşa müxtəlif dərəcəli bıçaq xəsarətləri yetiriblər, onlardan üçü ölüb" , - FPX-dən bildirilib.
"Müqavimət göstərən daha dörd nəfər xəstəxanaya yerləşdirilib, onlardan biri xəstəxanada ölüb" ,- Penitensiar Xidmətdən əlavə ediblər.
Rusiyanın Volqoqrad vilayətində xüsusi təyinatlılar həbsxanada girovları xilas ediblər.
Oxu.Az xəbər verir ki, bu barədə TASS-a Rusiya Qvardiyasının Mətbuat Xidmətindən məlumat verilib.
Volqoqrad vilayətində yerləşən islah koloniyasında girov böhranı Rusiya Qvardiyasının xüsusi təyinatlılarının müdaxiləsi ilə sona çatıb.
Xüsusi təyinatlıların snayperləri tərəfindən həyata keçirilən əməliyyat nəticəsində, həbsxana əməkdaşlarını girov götürən dörd məhbus bir neçə dəqiqə ərzində zərərsizləşdirilib. Nəticədə, bütün girovlar xilas ediliblər və hadisə uğurla başa çatdırılıb.
Rusiyanın Volqoqrad vilayətinin Surovikino şəhərində yerləşən islah koloniyasında qiyam yatırılıb.
Oxu.Az "Shot" "Telegram" kanalına istinadən bildirir ki, ilkin məlumata görə, bütün girovlar azad olunublar.
Qeyd olunur ki, terrorçuları hüquq-mühafizə orqanlarının əməkdaşları imkan dairəsində sağ götürməyə çalışıblar. Onlardan ikisi yaralanıb, biri isə öldürülüb.
Partladıcı qurğunu istehkamçılar zərərsizləşdiriblər.
Girovlardan biri, Federal Penitensiar Xidmətinin əməkdaşı Sergey G. xəstəxanaya aparılıb. Onda kəsilmiş yaralar aşkarlanıb və reanimasiyaya yerləşdirilib.
Rusiyanın Volqoqrad vilayətində İK-19 islah koloniyasına hücum edərək bir neçə nəfəri öldürən, yaralayan və əsir götürən şəxslər yeni tələblər irəli sürüblər.
Bu barədə Oxu.Az Rusiya "Telegram" kanallarına istinadən xəbər verir.
Özlərini İŞİD-çilər adlandıran hücumçular yeni video çəkiblər. Görüntülərdə 2 milyon dollar və helikopter istəmədiklərini, Rusiyanın Moskva vilayətində "Crocus City Hall"a hücum edən terrorçuların "qisas"ını aldıqlarını bildiriblər. Həmçinin yaralı girovu başqası ilə dəyişməyi təklif ediblər.
Eyni zamanda təsdiqlənməmiş məlumatlara görə, onlar öz tanışlarının istintaq təcridxanasından buraxılmasını tələb edirlər.
Hücumçular iddia edirlər ki, kadrlarda görünməməsinə baxmayaraq, onların əlində çox sayda girov var. Həmçinin videogörüntülərdə İK-19-a hücum edənlərdən biri - Tacikistandan olan 23 yaşlı Rüstəmçon Navruzinin əldəqayırma kamikadze jiletini geyindiyi və əlində detonator tutduğu əks olunub. Partlayıcı maddənin benzin və sənaye mayelərindən hazırlandığı ehtimal olunur və həcmi 5-7 litr təşkil edir.
Rusiya Prezidenti Vladimir Putin Daxili İşlər Nazirliyinin (DİN), Milli Qvardiyanın və Volqoqrad vilayətinin digər təhlükəsizlik orqanlarının rəhbərlərinin 19 saylı İslah Koloniyasındakı (İK) vəziyyətlə bağlı məruzələrini dinləyəcəyini bildirib.
Oxu.Az xəbər verir ki, bu barədə yerli media məlumat yayıb.
"Federal Penitensiar Xidmətin rəhbəri Volqoqrad vilayətindəki islah koloniyasında yaranan vəziyyət barədə mənə məlumat verdi", - Rusiya lideri Rusiya Təhlükəsizlik Şurasının daimi üzvləri ilə əməliyyat müşavirəsini açarkən deyib.
"Bununla bağlı daxili işlər naziri, Federal Təhlükəsizlik Xidmətinin direktoru, (Rusiya Qvardiyasının rəhbəri) Viktor Vasilyeviç Zolotovun fikirlərini və qiymətləndirmələrini dinləmək istərdim. Bundan sonra biz Vladimir Aleksandroviç Kolokoltsev tərəfindən hazırlanmış planlaşdırılan məsələyə baxacağıq", - prezident bildirib.
Məlumata görə, Surovikinodakı koloniyaya çevik qüvvələr və Volqoqrad vilayətinin imamı gəlib.
Çevik polis əməkdaşlarının fotoları media tərəfindən yayımlanır. İmamın gəlişi barədə məlumatı "Baza" "Telegram" kanalı verib. Məlumata görə, girov götürən məhbuslarla danışıqlara başlamaq üçün təhlükəsizlik qüvvələrinin icazəsini gözləyir.
Məlumata görə, İK-19-u ələ keçirən dörd terrorçu artıq koloniyada tanış olmuş və radikallaşıblar. Ona qədər bir-birlərini tanımayıblar.
Rusiyanın Volqoqrad vilayətindəki 19 saylı islah koloniyasının (İK) məhbus iğtişaşları zamanı xəsarət alan üç əməkdaşı hazırda reanimasiyadadır.
Oxu.Az Rusiya "Teleqram" kanallarına istinadən xəbər verir ki, onlardan birinin vəziyyəti kritik, digəri - Roman Ponomarevin isə son dərəcə ağırdır. Aleksey Lıqin üzündə deşilmiş yaralar və kəllə sınığı diaqnozu ilə xəstəxanaya yerləşdirilib, vəziyyəti ağır qiymətləndirilir.
İK-19-un digər əməkdaşı Yuri Mavrinin üzündə və başında yaralar var. Məlumata görə, huşunu itirmiş məhbuslardan biri Aleksandr Boyko da İK-19-da aldığı bıçaq xəsarətləri ilə xəstəxanaya yerləşdirilib. Onun sağ qalma şansı azdır - çox qan itirib.
İK-19-un rəhbəri Andrey Devyatovun başında çoxlu yaralar var.
"SHOT" "Telegram" kanalının məlumatına görə, onun başına çəkic və şüşə butulka vurublar. Hazırda reanimasiyadadır.
Rusiyanın Volqoqrad vilayətində İK-19 islah koloniyasına hücum edənlərin adları məlum olub və onlardan bir neçəsinin fotoşəkilləri ortaya çıxıb.
Bu barədə Oxu.Az Rusiya "Telegram" kanallarına istinadən xəbər verir.
1) Özbəkistandan olan 28 yaşlı Ramzindin Toşev - narkotik satışı maddəsi üzrə 8 il müddətinə azadlıqdan məhrum edilib;
2) Tacikistandan olan 28 yaşlı Nazirçon Toşov;
3) Özbəkistandan olan 29 yaşlı Temur Xusinov - qəsdən sağlamlığa ağır xəsarət yetirməkdə ittiham olunaraq 6 il müddətinə azadlıqdan məhrum edilib;
4) Tacikistandan olan 23 yaşlı Rustamçon Navruzi narkotik satışı maddəsi üzrə 7 il müddətinə azadlıqdan məhrum edilib.
Rusiyanın Volqoqrad vilayətində 19 saylı islah koloniyasının ələ keçirilməsi zamanı ölənlərin sayı artıb.
Bu barədə Oxu.Az Rusiya "Telegram" kanallarına istinadən xəbər verir.
Məlumata görə, hücum zamanı 3 nəfər ölüb. Ən azı iki nəfər terrorçuların əlindən qaça bilib ki, onların arasında bir islah koloniyası məmuru, bir məhbus var. Onlar xəstəxanaya yerləşdiriliblər.
Həmçinin tezliklə radikallarla danışıqlar aparmaq üçün Volqoqrad məscidindən mollanın gətiriləcəyi deyilir.
Rusiyanın Volqoqrad vilayətində məhbuslar 19 saylı islah koloniyasını ələ keçiriblər.
Bu barədə Oxu.Az Rusiya "Telegram" kanallarına istinadən xəbər verir.
Məlumata görə, koloniyada üsyan baş verib. Bir neçə məhbus Federal Penitensiar Xidmətinin dörd əməkdaşını girov götürüb və birini öldürüb. Həmçinin üç nəfərin də yaralandığı bildirilir.
Koloniyaya xüsusi təyinatlılar cəlb edilib. Hücum edənlər özlərini İŞİD üzvü adlandırırlar.
Zorakılıq aktı intizam komissiyasının iclası zamanı baş verib. Beşə qədər əməkdaş girov götürülüb.
İlkin məlumata görə, hücum edənlərin sayı dörd nəfər olub. Ümumilikdə müəssisədə 1 230 məhbus var.
Volqoqrad koloniyasında əməkdaşları girov radikallar ölkəni tərk etmək üçün pilotlu helikopter, iki milyon dollar və cənub-şərq istiqamətində hava dəhlizi tələb ediblər. Bundan sonra girovları azad edəcəklərinə söz veriblər.
Hazırda İK-19-a gedən yol bağlanıb.
