Cənubi Karolina ştatından senator Lindsi Qrem Rusiyanın bank və enerji sektorlarına qarşı sanksiyalar tətbiq olunması ilə bağlı növbəti həftə ABŞ Konqresində qanun layihəsini təqdim edəcək.
Oxu.Az-ın verdiyi məlumata görə, bu barədə respublikaçı qanunverici "Fox News" televiziya kanalına verdiyi müsahibədə bəyan edib.
"Rusiya ilə bağlı, növbəti həftə onların bank və enerji sektorlarına qarşı sanksiyalar təqdim edəcəyəm ki, danışıqlar masasına dəvət edək. Əgər atəşkəs və sülh danışıqları ilə razılaşmazlarsa, Moskvaya sanksiya cəhənnəmini yağdırmalıyıq. Növbəti həftə mən bununla bağlı qanun layihəsi təqdim edəcəyəm", - deyə o bildirib.
Senator əlavə edib ki, ABŞ-nin Kiyevə hərbi yardımında və kəşfiyyat məlumatlarının təqdim olunmasında fasiləsi ilə bağlı narahatdır.
"Ukrayna Prezidenti Volodimir Zelenski Ağ Evdə hər şeyi pozdu, biz çox uzun müddət mineralların müqaviləsi üzərində işləyirdik, amma indi əlimizdə nə varsa, odur. Müharibə davam edərkən Ukraynaya kəşfiyyat məlumatları və silahlar təqdim olunmasından imtina məni narahat edir. Əgər biz Ukraynanın "işığını söndürsək", bu, Əfqanıstandan daha pis nəticələnə bilər. Mən inanmıram ki, ABŞ Prezidenti Donald Tramp bunu istəyir", - deyə Qrem iddia edib.
Qeyd edək ki, bundan əvvəl senator bildirib ki, Zelenski Ağ Evdə Trampla mübahisə etməkdənsə, ABŞ-nin Ukraynanın təbii sərvətləri ilə bağlı təklifinə minnətdar olmalı idi. Qrem, həmçinin amerikalıların etimadını itirdiyi üçün Zelenskini "əsaslı şəkildə dəyişməyə və ya istefa verməyə" çağırıb.
