"OpenAI" şirkətinin baş direktoru və "ChatGPT"nin yaradıcısı Sem Altman süni intellektin gələcəkdə dominantlığı və bütöv iş kateqoriyalarının texnologiyalar tərəfindən ələ keçiriləcəyi barədə proqnozlarını bölüşüb.
Oxu.Az bu barədə "Tom's Guide" nəşrinə istinadən xəbər verir.
"Klassik peşələrin yox olması və yenilərinin yaranması tarix boyu müşahidə edilə bilər, çünki insan əməyini daha səmərəli yerinə yetirə bilən alətlər meydana çıxır. Belə alətlərdən biri də süni intellektdir", - deyə Sem Altman bildirib.
O vurğulayıb ki, texnologiyaların inkişafı bütöv peşə kateqoriyalarının yox olmasına gətirib çıxara bilər. S.Altman, xüsusilə müştəri xidmətləri sektoru üçün belə bir taleyi proqnozlaşdırır. Onun sözlərinə görə, süni intellekt bu işi canlı operatorlardan daha yaxşı yerinə yetirir.
"O, superağıllı, bacarıqlı bir insan kimidir. Menyu yoxdur, yönləndirmə yoxdur. O, şirkətdəki hər hansı müştəri xidmətləri agentinin edə biləcəyi hər şeyi edə bilər. O, səhv etmir və çox sürətlidir", - deyə Altman vurğulayıb.
Bununla belə, o əlavə edib ki, süni intellekt heç vaxt tibbi personalı tam əvəz edə bilməyəcək.
