Suriyanın yeni hökumətinə tabe olan təhlükəsizlik qüvvələri keçmiş prezident Bəşər Əsədin ölkənin qərbində hücumların təşkilinə cəhd edən silahlı tərəfdarlarını zərərsizləşdirməyə nail olub.
Oxu.Az-ın TASS-a istinadən xəbərinə görə, bu barədə Suriyanın keçid hökumətinin Müdafiə Nazirliyinin rəsmi nümayəndəsi Həsən Əbdül Qani məlumat verib.
Qani, həmçinin ölkənin sahilyanı əyalətlərində əməliyyatın başa çatdığını elan edib.
Onun sözlərinə görə, təhlükəsizlik qüvvələri Latakiya əyalətinin bir sıra şəhərlərində və Tartus əyalətinin bir neçə yaşayış məntəqəsində əvvəlki rejimin qalıqlarının qruplaşmalarını zərərsizləşdirə bilib və bunun nəticəsində təhdidlərin qarşısını almaq və regionun təhlükəsizliyini təmin etmək mümkün olub.
Suriyada gərginlik: Əsəd tərəfdarlarından ibarət silahlı qruplaşmalar zərərsizləşdirildi
