Tailandda tanınmış "Hawell's" dondurma brendinin yaradıcısı, multimilyonçu Siriponq Akkarasriyuk öz biznesini sataraq rahiblik həyatını seçmək qərarına gəlib.
Oxu.Az xəbər verir ki, bu barədə "AsiaOne" nəşri xəbər yayıb.
İş adamı şirkətini 165 milyon bata (təqribən 8.5 milyon manat) satışa çıxarıb. Satış müqaviləsinə torpaq sahəsi, zavod, ofis, mağaza, dondurma reseptləri, "Hawell's" ticarət markası və müxtəlif aktivlər daxildir. Akkarasriyuk qeyd olunan məbləğə alıcı tapmağa kömək edəcək şəxsə əlavə olaraq 5 milyon bat (258 min manat) mükafat verəcəyini vəd edir.
Sahibkar artıq 15 ilə yaxındır ki, həyatını tamamilə buddizmə həsr etməyi planlaşdırdığını bildirib. O, iki ildən sonra ənənəvi ailə və sosial həyat tərzindən birdəfəlik uzaqlaşmaq niyyətindədir. Buna qədər isə Akkarasriyuk yeni torpaq sahəsi alaraq orada meditasiya üçün xüsusi məkan yaratmağı hədəfləyir.
"Hawell's" markası 1999-cu ildə yaradılıb və qısa müddət ərzində Banqkok, eləcə də ətraf əyalətlərdə 22 filiala qədər genişlənib. Sonradan iri rəqiblərin təzyiqi ilə üzləşən brend 2014-cü ildə ticarət mərkəzindəki sonuncu şöbəsini də bağlamalı olub. 2023-cü ildə isə Akkarasriyuk müstəqil bir mağaza açaraq "Hawell's"i yenidən bazara qaytarıb.
