"Real Madrid"in futbolçuları İspaniya çempionatında "Valensiya" ilə oyunun fasiləsində "Mestalya" stadionunun mühafizəçiləri ilə qarşıdurmaya giriblər.
Oxu.Az bu barədə "Marca" qəzetinə istinadən xəbər verir.
Nəşrin məlumatına görə, birinci hissənin başa çatdığını bildirən fitdən sonra "Valensiya"nın idman direktoru Braulio Vaskes baş hakimin köməkçisinə kəskin etiraz edib. Bundan sonra "Real Madrid"in yarımmüdafiəçisi Cud Bellinqem Vaskesin kostyumundan tutub. Ardınca hər iki komandanın futbolçuları arasında mübahisə yaranıb.
Stadionun mühafizəçiləri mübahisəyə müdaxilə ediblər. İddiaya görə, "Real Madrid"in müdafiəçisi Antonio Rüdiger mühafizəçilərdən birinin üzünə əli ilə zərbə endirib.
"Marca"nın yazdığına görə, "Valensiya" insidentin videogörüntülərini hakimlərə təqdim edib. Lakin hadisə matçın rəsmi protokolunda qeyd olunmayıb.
