"Taliban" lideri Heybətullah Axundzadə üzrlü səbəb olmadan ardıcıl olaraq camaat namazını buraxan dövlət qulluqçularının Hənəfi məzhəbinə uyğun olaraq cəzalandırılacağı barədə fərman verib.
Oxu.Az xəbər verir ki, bu barədə "Tolo News" telekanalı məlumat yayıb.
Qeyd olunur ki, fərmana əsasən, dövlət qurumlarının bütün işçiləri və məsul şəxsləri müəyyən olunmuş vaxtlarda beş vaxt namaz qılmalıdırlar. Eyni zamanda, qanunu pozanların hansı cəza ilə üzləşəcəkləri barədə məlumat verilmir.
Xatırladaq ki, 2021-ci il avqustun əvvəlində "Taliban" islamçı radikal dini-siyasi hərəkatı Əfqanıstan hökumət qüvvələrinə qarşı hücumlarını gücləndirərək avqustun 15-də Kabilə daxil olub və ertəsi gün müharibənin başa çatdığını elan edib. İki həftə ərzində Qərb ölkələrinin vətəndaşları və onlarla əməkdaşlıq edən yerli sakinlər fəal şəkildə təxliyə ediliblər. 2021-ci il avqustun 31-nə keçən gecə ABŞ hərbçiləri Kabil hava limanını tərk edərək, ABŞ-nin Əfqanıstanda təxminən 20 illik hərbi mövcudluğuna son qoyub.
Rəylər