"ABŞ Prezidenti Donald Tramp bildirib ki, İranla əldə ediləcək hər hansı yeni razılaşma 2015-ci ildə imzalanmış Birgə Hərtərəfli Fəaliyyət Planının tamamilə əksi olacaq".
Oxu.Az xəbər verir ki, Ağ Ev lideri bu barədə "Truth Social" hesabında açıqlama yayıb.
"Əgər İranla hər hansı bir razılaşma imzalayacağamsa, bu, tamamilə ədalətli və lazımi səviyyədə bir müqavilə olacaq. Bu addım İrana böyük həcmdə maliyyə vəsaiti verən və onun nüvə silahı əldə etməsinə birbaşa şərait yaradan Obama dövründəki sazişə qətiyyən bənzəməyəcək. Bizim təklif etdiyimiz razılaşma bunun tam əksidir, lakin hələ heç kim onu görməyib və mahiyyətindən xəbərsizdir. Hazırda sənəd üzrə tam razılıq əldə olunmayıb. Buna görə də heç bir məlumatı olmadan tənqid edən uğursuz şəxsləri dinləməməlisiniz. İllər əvvəl bu məsələni həll etməli olan sələflərimdən fərqli olaraq, mən zərərli müqavilələr bağlamıram", - deyə o, paylaşımda qeyd edib.
