Trampın ABŞ tarixində ən böyük deportasiya planı başladı? - Qanunsuz miqrantlar barədə qərar verildi

ABŞ Daxili Təhlükəsizlik Departamenti ölkənin hüquq-mühafizə orqanlarının səlahiyyətlərini genişləndirib və onlara qeyri-qanuni miqrantları "sürətləndirilmiş prosedur"a əsasən, yəni immiqrasiya məhkəməsinin qərarı olmadan deportasiya etməyə icazə verib.

Bu barədə Oxu.Az TASS-a istinadən xəbər verir.

"Bu dəyişikliyin nəticəsi olaraq milli və ictimai təhlükəsizlik gücləndiriləcək, eyni zamanda, immiqrasiya ilə bağlı qərarların operativ verilməsini asanlaşdırmaqla hökumət xərcləri azaldılacaq", - deyə departamentin ABŞ Prezidenti Donald Trampın andiçmə mərasimindən bir gün sonra dərc edilmiş bəyanatında bildirilib.

Daxili Təhlükəsizlik Departamentinin məlumatına görə, bu qərar ölkəyə daxil olmaq və qalmaq, həmçinin ölkədən çıxarılmaqla bağlı müdafiə hüququ olmayan şəxslərin ABŞ-dən təcili şəkildə deportasiyasını təmin edəcək.

Yerli KİV-in yazdığına görə, daha əvvəl sürətləndirilmiş deportasiya proseduru əsasən qeyri-qanuni mühacirlərin böyük axını ilə üzləşən cənub ştatlarında tətbiq olunurdu. İndi isə qeyri-qanuni mühacirlərin bütün ABŞ ərazisində sürətli şəkildə çıxarılmasına icazə verilib.

Xatırladaq ki, yanvarın 20-də Donald Tramp ABŞ-Meksika sərhəddində fövqəladə vəziyyətin tətbiq edilməsi barədə fərman imzalayıb. ABŞ lideri bildirib ki, fövqəladə vəziyyət cənub sərhəddinə qoşunların göndərilməsinə və qeyri-qanuni miqrantların ölkəni "katastrofik işğalının dəf edilməsinə" imkan verəcək.

Qeyd edək ki, Tramp daha əvvəl dəfələrlə immiqrasiya siyasətinin sərtləşdirilməsi və qeyri-qanuni mühacirlərin məcburi deportasiyasının zəruriliyi ilə bağlı çıxış edib və ABŞ tarixində ən böyük deportasiya əməliyyatına başlayacağına söz verib.