ABŞ prezidentinin xüsusi elçiləri Stiven Uitkoff və Cared Kuşner Kiyevə qatarla səfərləri zamanı bir neçə yeməyin dadına baxıblar.
Oxu.Az-ın xəbərinə görə, bu barədə Ukraynanın Strana.ua nəşri məlumat verib.
Məlumata görə, ABŞ-li rəsmilərə Krım çörəyi, məzələr (soyuq qəlyanaltılar seçimi), tərəvəz və doğranmış ət təqdim edilib. Onlara həmçinin kabab, yay salatı və quru meyvələrdən hazırlanan kompot - xoşaf təklif edilib.
Xatırladaq ki, sentyabrın 5-də ABŞ prezidentinin xüsusi elçiləri Stiven Uitkoff və Cared Kuşner Rusiya paytaxtı Moskvaya səfər ediblər və orada Prezident Vladimir Putinlə danışıqlar aparıblar. Rusiya prezidentinin köməkçisi Yuri Uşakovun sözlərinə görə, görüş məlumatlandırıcı və son dərəcə səmimi keçib. Üç saat 10 dəqiqə davam edən söhbət zamanı Uitkoff və Kuşner Ukraynadakı münaqişənin nizamlanması ilə bağlı fikirlərini Putinlə bölüşüblər.
Ertəsi gün ABŞ rəsmiləri Kiyevə yola düşüblər. Onların təyyarəsi Moskvanın "Vnukovo" hava limanından yola düşüb və gecə Polşanın Jeşuv şəhərinə eniş edib. Oradan Ağ Evin xüsusi elçiləri qatarla Ukraynanın paytaxtı Kiyevə yola düşüblər. Kiyevdə onlar Prezident Volodimir Zelenski ilə görüşüblər və danışıqlardan sonra Zelenski ədalətli sülhə nail olmaq səylərini bəyan edib.
